الخميس، 30 ديسمبر 2010 | By: همزة

القصة الاخيرة لشهرزاد


يحكى ايها الملك السعيد ذو الرأى الرشيد

ان علاء الدين صاحب المصباح السحرى اعلن نيابة عن ابطال الحكاوى والحواديت

اننا نعلن الانسحاب من دنيا الخيال بعد ان اصبح للخيال عالم يدخله البشر

ونبتهل وندعوا على المدعوقة الانترنت ان يصبها فيروس ويتنشر ..

بعدما سحبت مننا مستمعى القصص والحكايات اللى عاشوا مغامرتنا والخيال ..

وجابوا لعفريت مصباحى السحرى اكتئاب لما بقت بشوية زراير يتحقق المحال

وبساط الريح قاعد زعلان بعد اما الزباين سافروا من غير ما يتنقلوا من المكان ..

دلوقت كل واحد ممكن يبقى بطل جوا الانترنت واصبح مصيرنا زى ما نكون بنلت

واخيرا سلام من غير كلام

لا احد يصيح معترض او فرحان لان مفيش حد حضر اصلا للاستماع واخيرا انفض الاجتماع

وسيبنى لبكرة الله يخليك

يوه هو انت ومسرور رجعتوا تانى تخشوا على الفيس دوج ده طب سايبنى احكى لمين

------------
اكيد دى كانت هتبقى الحكاية الاخيرة لشهرزاد ... مش كدة والا اية

الاول احب اعرفكم بنفسى

انا تايه واللى بتشخبط على الحيطة هناك دى حيرانة ..

لسه مش واخدة بالها سيبوكوا منها ركزوا معايا

انا خبير نتاوى من اواخر التسعينات تقدروا تقولوا كدة من 97 ..

عيشت وتعايشت مع عالم الانترنت منذ ذلك الزمان(حلوة العبارة اللى فاتت دى )...

واللى محضرش منكم موضوع النت من الاول هابتدى معاكم اول الحكاية

بعد اما اعتزلت شهرزاد الرواية

بس الاول انادى على حيرانة تتعرف عليكم وتتعرفوا عليها ..

هاروح دلوقت اكتب لكم اول حكاية ويارب تعجبكوا ومستنى ردكم وسايب معاكم حيرانة

------------

احم احم .. اعرفكم بنفسي .. انا اسمي؟ امممممم موش مهم ..

عمري ؟ اممممممممم موش فاكرة .. مهنتي ؟ اممممممم موش عارفة ..

بس اللي عارفاه كويس اوي اني مابحبش اتعرف علي حد

وده كان قانون رقم واحد من قوانيني النتية اللي هرصهالكم بعدين براحتنا (وش شرير) ..

دخلت النت سنة 2001 وليه تاريخ نتي عظيم و انتصارات وفتوحات ديجتالية واسعة المجال ..

ياما ابدت شات رومز (من غير فليت ولا ريد ) وياما استعمرت منتديات ..

وياما دخلت في خناقات فيرشوالية .. فشر خناقة البسوس ولا عركة بيرل هاربورت ..

كنت زعيمة ولا كل الزعازيع وكنت عبيطة ولا كل العبابيط .. عشت الوهم بالطول والعرض والورب ..

ولو عندكم وقت تابعوا حكاياتي وهتستفيدوا من حواراتي

وللحوارات بقية ...
الأحد، 26 ديسمبر 2010 | By: همزة

ملتقي التايهين



بتقعد علي النت ستاشر سبعتاشر ساعه في اليوم تتفلسف علي خلق الله ؟

بتلعب جيمز بالعبيط ؟ خصوصا فارم فيلي وفارم تاون وكان نفسك تبقي

فلاح بس ماجبتش مجموع ودخلت هندسة او طب ؟

فاتح الفيس بوك عشروميت ساعه في اليوم تندب حظك علي الاستيتس ؟

بتدور علي عروسة ؟ بتدروي علي عريس ؟ وقالولكم انهم المزاغيد

مرمين علي النت ف جيتم تقفشوهم ؟

عاطل ومش لاقي شغل ورامي سي فيهات في كل حتة بس الاوفرز اللي

بتتعرض عليك لا تتناسب مع امكانياتك الفذة؟

طالب ووراك مذاكرة متلتلة ومستني ربنا يفرجها عليك وتفتح كتاب وده

غالبا مش هيحصل الا جوه اللجنة وتتقفش بيه ان شاء الله؟

عندك مشاكل عاطفية حادة بتسبب لك ارق وارف واسهال في المشاعر

ونفسك في حدد تفضفضله ويقولك تعمل ايه ؟؟

بتداونلوود افلام بالعبيط تمسحها تاني يوم علشان تنزل غيرها ؟؟

عاملي فيها مثقف وبتدونلوود كتب بالهبل ماقرتش منهم حرف ؟؟

بتشات تسعومية ساعه في اليوم واللي تعيده تزيده زي اللي بيلت ويعجن

فطير ؟؟

اذا كنت اي حالة من دول او غير دول فانضم لاكبر ملجأ للتايهين علي النت

هتلاقي عندنا اكبر دكاترة منفسنيين فشلت معاهم كل نظريات علم النفس

الحديث والقديم

عندنا نتيتته احتراف وانحراف من ايام ماكانت النت بتشتغل بالفحم

والكمبيوتر بيشتغل بالبخار

سلكنا دروب النت منتدي منتدي وبلوج بلوج وسايت سايت .. خبرة لم

ولن تتكرر في الفشل والاحباط والاكتئاب والغريب اننا لسه عايشين

(بركة دعا الوالدين)