السبت، 31 ديسمبر 2011 | By: Unknown

ايسلين - توتة توتة فرغت الحدوتة


اعزائى وعزيزاتى اصدقاء ببليوجرافى رحلة تايه النتيه

مساءكم سعيد وعام جديد يارب يبقى نهاية لاحزان كتير وبداية لاستقرار وتحقيق احلام

يتوقع خبراء الارصاد منتصف هذه الليلة سقوط زجاجات المنكر من السيارات المحملة بالاوغاد

ف على السادة اللى هاينزلوا الشارع بعد منتصف الليل ارتداء الملابس الواقيه من الرصاص

قبل ما اكتب هذا البوست رجعت لهدايا ايسلين

كلها موجودة ما عدا الجواب اللى كان مكتوب على كارت معايدة

وقعدت اتذكر الكلام

افتكر ان اوله بدأ بجمله " برغم ان بيننا مسافات شاسعة الا انى احس انك قريب منى"

" برغم اننا لم نتقابل وجها لوجه الا اننى اشعر بانى اعرفك منذ زمن بعيد "

فيه جمل كتير نستها لكن مازلت متذكر توقيعها و كتابتها لكلمة "احبك " باللغة الصينية

كمان كان فيه مطوية صغيرة جدا بتحكى قصة نشأة سينجابور و رمزها رأس اسد وجسم حصان البحر

و المنديل اللى لونة كحلى وعلية رسم لرمز البلد و دبوس صغير بنفس الشكل كان ملحق بالكارت

اما الصورتين فكانت لها فى اماكن مختلفة اثناء كورس تبع شركتها لالمانيا

يوم عن يوم كنا بنقرب لبعض اكتر

وكنت بستنى وقت دخولها ع النت .... وخلاص بقى كبرت دماغى من الدراسة

ماكنتش بروح وعلى وشك انى اسقط لاول مرة فى حياتى

يعنى تضحية بسيطة لاول بنت حبتنى فى تاريخى

اهو بدل البهدلة اللى اتبهدلتها من بنات بلدى

برغم ان اول بنت اتمشت معايا ووصلتنى لحد بيتى

اه هى اللى وصلتنى لبيتى كنا فى تانية ابتدائى

واول بنت عقدتنى فى حياتى من غباء البنات كانت فى سنة خمسة ابتدائى

ولد متخلف كتب لها جواب وبعتوه معايا وقالى ان زميل تانى هو اللى كاتبهولها

والسبب انهم واقفين بوابيين فى اليوم ده على باب مدير المدرسة تحت بند الحكم الذاتى

على اساس ان المدرسة اعلنت الاستقلال عن الادارة التعليمية

المهم فتحت الورقة لاقتها جواب حب عينى يا عينى

المهم اخدت الورقة واديتها للبنت وقلت لها تنزل لمدرس الفصل تبلغه بالموضوع

مدرس الفصل الله يعمر بيته ضربنى علقة بنت حلال

يعنى ضرب اتنين مظاليم مع الواد اللى كان السبب

وطلب استدعاء لولى امره عشان يلموا الفضيحة

الواد اصلا ابوه صعيدى مش عارف ليه متخيل ان ابوه فرح ان ابنه بقى راجل

وعايز يفتح بيت ويبقى اب وهو فى خمسة ابتدائى

واخيرا فلح فى العلام وبقى يكتب جوابات غراميه

ده غير حادثة معرض الكتاب اللى اتظلمت فيها وماكنش ليا فيها ناقة ولا جمل

كنا فى الاعدادية ورحنا معرض الكتاب انا واتنين اصدقائى

مجموعة بنات كانت بتتعاكس من مجموعة صبيان

راحوا جابولهم العسكرى

العيال مشيوا واتارينا قعدنا مكانهم

البنت المعمصه اللى فيهم جات وشاورت عليا وقالت للعسكرى " هو ده اللى ادانى الكارت "

والعسكرى يقولى " مش عيب عليك انت مالكش اخوات بنات " والاسطوانة دى

وانا من الصدمة عمال ابتسم ومش عارف

طب ننضرب والا نتهزق بسبب بنت جميلة ماشى برغم انى بحترم نفسى جدا

لكن كل مرة تطلعى لى قردة تلبسنى فى الحيط حرام بقى

والاندال اصدقائى عملوا ميعرفونيش واللى عمل نفسه بيقرى فى جرنال واللى ادانى ضهره

مفيش غير واحدة ست اللى انقذت الموقف وقالت له دول لسه جايين دلوقت

والبنتين القمامير اللى فيهم قالوا لبعض لا مش ده

وانتهى الموقف العصيب

من يومها كرهت ام البنات وبالاخص الاغبياء منهم والاكتر الوحشين

المهم عشان ماتتهوش زى ما انا تهت

ايسلين غيرت فكرتى عن البنات

وعرفت ان فيه نوعيه تانية عارفة معنى الرقة ورهافة المشاعر

مش ال L'mere d'ghoul

اللى ضحكوا علينا ايامها ويقولوا عليهم بنات

المهم كفاية كدة عشان شايف ناس عنيها احمرت وبدأوا يزمجروا ويكشروا عن انيابهم

مشكلتى مع ايسلين كانت فى شقين

المعتقد الدينى لانها كانت كونفوشيسية وتانى حاجة بعد المسافة

وانا ايامها كنت بدرس وماكنتش اقدر اوفر مصاريف سفر عشان ازورها

ولا دلوقتى حتى عشان اكون صريح معاكم

المهم طلبت منها بما انها بتقبض على قلبها قد كدة

انها تقوم بالخطوة الجريئة وتزور مصر

اهو منها سياحة ومنها تتفرج على اثر نادر من اثار مصر اللى هو انا

طلع لى فى البخت ابوها اللى رفض باصرار انها تسافر

عشان حوادث الارهاب اللى حصلت خلال فترة التسعينيات

وانا من ناحيتى بكل شهامة قلت لها ان استمرار مشاعرنا بالطريقة دى يعد استهلاك فى غير محله

لا هى هاتعرف تيجى ولا انا هاعرف اسافر لها

المستقبل غامض بالنسبة لنا

المهم انفصلنا بالتدريج

بعدها بفترة بعت لها ايميل اسأل عليها

لاقيتها اتجوزت واستقرت فى حياتها

تمنيت لها التوفيق واختفت زى اللى اختفوا

بس سابت ذكرى لواحدة من اجمل الفترات فى حياتى

سبتكوا بالعافية

الأربعاء، 30 نوفمبر 2011 | By: Unknown

ايسلين ..... قلب كبير


اعزائى المزمزيلات والوزوزليين العواف عليكم

مش قادر اعبر لكم عن فرحتى بالانتخابات اللى بدأتها بلدنا اليومين دول

حاجة كدة تشرح القلب الحزين

والحزن ده حاجة كدة دايما تيجى بعد الحب اللى على اصوله مش التايوانى

الشعراء والادباء عالم بجد دايما قصصهم واشعارهم تنتهى الله يحرقها بنكد

تبتدى دايما جميلة رقيقة حالمة وتنتهى بفاجعه حلوة فاجعة دى

الا ليه البنت اللى بتأكل كتير يقولوا عليها مفجوعة

ما علينا عشان البوست يعدى على خير و ما حدش يوز عليا

عيل هاكر يزغزغ لى المدونة

نرجع لقصتى مع ايسلين

اوعوا تكونوا نسيتوا

بعد اما زعلت الانسة فى يوم عيد ميلادها

فوجئت انها بعتت صورتها على الايميل الخاص بيا

عسولة كدة شبه البنت الانيمى بتاعت البوست اللى فات

رديت عليها بايميل ياخد اوسكار المراسلات النتية

مفعم كدة باحاسيس مش فاكرها الصراحة

بس البنت انبسطت قوى من كلماتى والمشاعر المرهفة المعبرة

عن اعجابى بها تقريبا كدة شرارة اللامور شطت فى قلبها

وكما قال الفيلسوف اسمه ايه

" الرجل يعشق بعينه والمرأة تعشق بأذنيها والطفل ببقه "

ومعلوماتى ساعتها ان البنات الاسيويات عندهم عقدة الخواجة زى عندنا كدة

يعنى نسبة كبيرة منهم بتحلم تتجوز شخص من دولة تانية

زى ما احنا الشباب عندنا بيتهبل لما يشوف شعر اصفر وعيون ملونة وقوام غزلان

طبعا انا مش بنبط على بناتنا اللى ربنا ابتلانا بيهم

اقصدى اللى ينشكوا فى ننى عنيهم .......... قصدى يووووه بقى

ما علينا

زاد من سرعة الاشتعال ان ايامها كان فيلم تايتنك لسه نازل

وعموكوا تايه كان من اشد المعجبين بالمطربة الشعبية شيلين بلون

طبعا اغنيتها فى الفيلم ده " قلبى سيواصل " كانت مكسرة الدنيا

واخدت وقتها المركز التانى بعد اغنيه النجمه العالمية فاطنة عيد " هاشكيك للقاضى"

وكنت دايما مشغل الاغنية على الكومبيوتر وبسمعها كتير

اغنية شيلين مش فاطنة يا ظريف

وحصل كتير وقت لما كنا بنتكلم ان ااقولها انى مشغل الاغنية

وتقولى انها هى كمان بتسمعها كان بنا حاجات مشتركة كتير

وكلمتنى تليفونيا كذا مرة

وحسيت فعلا بمشاعرها اكتر لما بعتت لى رساله على عنوان سكنى بخط اديها

لاول مرة فى حياتى ااقرى رسالة فيها كلمات حب راقيه جدا

وكان مع الرسالة صورتين لها وهديتين

ولأنى بتابع مؤشرات النتائج الاولية للانتخابات

نكمل المرة الجايه بقى وعليكم خير

تحية مصر دولة حرة مدنية بمرجعية اسلامية

كلها حرية وعدالة ونور وفضيلة واصالة وخير الامور الوسط

اصوتكم نزيهة وانتخابتكم سعيدة

الاثنين، 31 أكتوبر 2011 | By: Unknown

ايسلين ..... بداية مش ولابد


اعزائى اسمكوا ايه

كل عام انتم بخير

حقيقى الزمن شيئ عجيب لا يتعب ولا يكل

بيجرى بسرعة عجيبة ولا حد يقدر يجاريه

هو مستعجل كدة ليه مش يستنى شوية يأخد نفسه

ويضرب له كوباية شاى ... ده عمره ما وقف

من يومين كنا بنهنئ برمضان بعد كام ثانية جه العيد وشوية وطب العيد الكبير

الخرفان فى الشوارع بحس ان على وشهم عبارة هو فيه ايه ؟ هو مفيش غيرنا؟

المهم

اثناء دراستى جات عليا فترة مليت وكنت عايز اسيب الدراسة

فترة كانت عصيبة بجد وكنت فى موود فظيع

هو اشمعنى العيال ماملوش

اكيد يا اما عشان المدامات اللى مصاحبينهم وبيروحوا وييجوا معاهم

او اصدقاء السوء اللى بيضربوا معاهم

الله يرحم ايامك يا مزمزيل ام خدود هى كمان جت عليها فترة اختفت فيها

قالى واحد من اصدقاء السوء انها فى المصحة يا ولداها بتتعالج من آثار الادمان

مين ام خدود دى يا سيادة الكونستابل؟

مالكش فيه بعدين مش رابط الحزام ليه

خلاصة الكلام كانت فترة نفسيا ماكنتش تمام

كنت دايما عايش اون لاين بحاول اهرب من واقعى وحالتى النفساوية

وفى يوم من الايام قابلتها على النت

كانت فى شغلها وداخله الاى سى كيو فى الخباثة

اتعرفت عليها وانا فى موود زفت

حاجة كدة نظام

تايه باشا المكتئب : العواف عليكى ازيك يا ادلعدى

ايسلين : هاى ازيك؟

تايه باشا المكتئب :سيدك تايه من مصرى وعندى 23 سنة ولسه بدرس

ايسلين : واو حاجة حلوة خالص انا ايسلين 21 سنة من سنجابورا

تايه باشا المكتئب: الله اسمك جميل الا ايه بقى معنى اسمك

ايسلين : اسمى باللغة الصينية يعنى الصغيرة

تايه باشا المكتئب : وليه سموكى بالاسم دة

ايسلين : عشان اول ما اتولدت كان جسمى صغير جدا بالنسبة للمواليد

تايه باشا المكتئب لنفسة " يا زين ما اختاروا ابوكى وامك ايه الذل ده"

ايسلين : وانت اسمك له معنى

قلت لها على معنى اسمى

تايه باشا المكتئب: بتدرسى يا وليه والاايه ظروفك

ايسلين : لا انا بشتغل فى شركة خاصة فى مجال البرمجيات

تايه باشا المكتئب لنفسه " يا بنت اللعيبة بتخلصوا بدرى امال انا لسه ماخلصتش ليه

مع انى الحمد لله ما سقطش ولا سنه بس احتمال اعملها السنة دى على سبيل التغيير "

تايه باشا المكتئب : وانت على كدة مصاحبة والا متجوزة والا مطلقة والا حالتك الزفت الاجتماعية ايه

ايسلين : لا انا مش مصاحبة ومش متجوزة

تايه باشا المكتئب لنفسه " اكيد قصيرة لدرجة ان مفيش حد شايفها اصلا او شبه الفنان

"هانى شاكك انى افرح " فى الفيديون بتاع اغنية "معقول نتقابل تانى"

كان دقنة يادوبك منبته ومكتئب و لابس بالطو دكاترة مع انه كان طالع

قاعد على طبلية دوارة وبيعمل قلل قناوى

والوليه اللى بيحبها ايام كى جى وان كانت جاية تشترى طاجن

عشان تعمل مرزوعة بالبامية للمستنيل على عينه جوزها

حاجة كدة تغم

تايه باشا المكتئب : ممكن اشوف صورتك يا خالة

ايسلين : انا معنديش الا صورة واحد بس مش حلوة قوى

تايه باشا المكتئب لنفسه يا دى النيلة اهو ده اللى كنت مقلق منه

تايه باشا المكتئب : لا لا مش مشكلة ابعتى

ايسلين : لا معليش هابقى ابعت لك صورة تانية لما نتقابل تانى

تايه باشا المكتئب لنفسه " عندها امل نتقابل تانى ..... معقول نتقابل تانى "

تايه باشا المكتئب : لا مش مشكلة ابعتى

ايسلين : خليها بكرة

تايه باشا المكتئب : يووه بكرة ايه انا عايز اشوف صورتك دلوقت

ايسلين : بجد هابعت لك صورة بكرة صدقنى

تايه باشا المكتئب : لا خلاص بقى مش مشكلة سلام

ايسلين : عموما انا متشكرة انك زعلتنى فى يوم عيد ميلادى

تايه باشا المكتئب لنفسه

" يا دى النيلة كدة جرحت احاسيس البنت يا متوحش وكأبتها فى يوم عيد ميلادها"

تايه باشا المعتذر : اعتذر عن قلة ذوقى وكل سنة وانت طيبة

ايسلين : اشكرك

تايه باشا المعتذر : بجد انا بعتذر بشدة

ايسلين : حصل خير

تايه باشا المكتئب لنفسه

" شكلها كدة مش هاتكلمنى تانى خلاص اقفل معاها بشكل ظريف بدل الهباب اللى انا هببتوه دة"

تايه باشا المعتذر : عموما ده ايميلى عشان لو معرفتش ااقابلك اون لاين تانى وعلى فكرة انا

مستنى تبعتى لى الصورة عليه لو مش لسه زعلانة منى

ايسلين : مفيش مشكلة انا مضطرة امشى دلوقت

تايه باشا المعتذر : اوكى وارجو ماتكونيش زعلانة منى

ايسلين : لا مش زعلانة سلام

تايه باشا المكتئب : سلام

انا بجد زعلت انى عكننت على البنت

وقررت انى اصلح الامور بس بعدين بقى مش وقته دلوقت

كنت سهران طول الليل على النت والفجر شقشق وكنت عايز انام

على سيرة النوم

انا هاقوم انام بقى عشان عندى شغل مش فاضى ااقعد اتسامر معاكوا

يالا ياض انت وهى فزوا قوموا شطبنا النهاردة

اشوفكوا على خير بعد اما تسنوا السكاكين و تقزقزوا الخروف المسكين

سلام