الـــسحـــاب الأبــــيــــض الجزء الأول

عنوان رومانتيكى مش كدة .....

زى حسن ونعيمة يا سلام على اسم نعيمة

اسم لذوذ وطيوب وحبوب وكل ما اخرة (وذ) او (وب)

واسمها ده جه ازاى يا سى تايه

ااقولك يا بت

بعد اما الوليه امها ولدتها

جه ابو نعيمة فى اديه مقصات زى ابو جلامبو

لانه بيشتغل مزين يطل ودخل علي مراته و قالها نعيما

فبصت له شذرا وزعقت فيه بصوت سرسوع

وقالت له نعيمه وكملت فى سرها " يا حمار"

المهم سيبكوا من شغل المزينيين ده

وتولع نعيمة على ابوها وامها فى يوم واحد

فى يوم من ايام طلعاتى النتيه J

و عبر برنامج الرغى الجديد ال MIRC

وفى غرفة الرغى بتاعة Egypt

اللى كنت بدخلها زهق لان الناس يا اما كانوا بيشتغلوا بعض

يا اما كانوا يتخانقوا مع بعض يا اما مأنتمين مع بعض

والعيال الادمن (مديرين غرف الرغى) اللى هما مسئولين

عن حفظ حالة السلم فى الغرفة ومنع البذاءات

و المهمة الرئيسية ذات الاهمية القصوى عندهم السهر على راحت الوزوزيلات

اللى فى الغالب بيبقوا فى حيازتهم ومنع التحرش النتى بهم

المهم ماكنوش عيال صيع مقطعين بطايقهم السخسية كان فيهم سذج

راجعوا قصة الاشتغالة اللى تمت مع واحد من الادمن بتوعهم فى البوستات الاولانيه

الطابع المصرى الفرعونى القديم عندهم كان غلاب زى اى حد اما بيبقى

مسئول عن حاجة يبدأ يمارس نشاطه الاستبدادى

فكانوا مع اول اختلاف يعملوا طرد أو (kick)

واحيانا يكملوا كرمهم بعمل حاجة تانيه الا وهى حظر (Kick and Ban)

لدخول الغرفة على السادة المشاغبين امثالى

وساعات الجنونة تشتغل يقوموا يطردوا الناس رخامة

المهم انا لما ابقى زهقان كنت اعمل حاجة من اتنين

يا اما ادخل على غرف العيال اليهود السيس

وافضل أأبح واغيظ فيهم لحد اما يطردونى ويعملوا kick and ban))

يا اما اتسنكح فى غرفة Egypt

اهو نعمل خير ونسخن العيال على الادمن

او اتكلم مع العيال اللى بيشتغلوا البشر وعاملين نفسهم بنات

الهدف ايه

ااقولكم منها لو صادفت ممكن تطلع مزمزية ويبقى فرجت

ولو غير كده اهو ادينا بنتسلى

لمحت بعينى الاسم ده فى الغرفة اسم السحاب الابيض

اسم نواعمى حريمى

بس ممكن يبقى اشتغاله

رحت فاتح معاه برايفت شات (Private Chat)

تفتكروا طلع ايه؟

لا المرة الجاية اشوفكوا على خير

الـــرغــى وســنــيــنــه (2)

اعزائى البخلاء الا ما حد عبرنى بكوباية ميه حتى ابل ريقى

من البوست اللى فات وانا مستنى اى عزومة بس للاسف كلها عزومة مراكبيه

الا ايه عزومة مراكبية دى يا معلم تاية

ااقولك ياض

الاخوة المراكبيه لما يتقابلوا فى وسط البحر يقوموا يسلموا ويعزموا على بعض

ويشدوا قوى فى العزومة قلبهم ميت الناس دى والا ايه

يعنى اكيد مش هايغرقوا المراكب عشان خاطر السلامات

واكيد يعنى مش هايرموا نفسهم فى البحر عشان خاطر كوباية شاى بتلاتة تعريفه

ايه الغباوة دى

الا لو كانت عزومه على اسبريسو فى ايطاليا وبالمرة شغلانه

كنا بنقول ايه اه نكمل الحكاية بس اقرا اللى فات عشان تواصل مع اللى جاى

بعد فترة اتعرفنا على شباب نتاوية عن طريق ال MIRC

وفى يوم اتفقنا اننا نتقابل قدام النيل هيلتون

المهم اتقابلنا واتعرفنا على بعض وجها لوجه

واحد منهم قالنا ان العيال بتوع Egypt هيتقابلوا فى نفس اليوم

بس جوا النيل هيلتون

وان المقابلة فيها بنات من نفس الرووم

- مــوســــيــقى تــصــويــتــيــة -

لسيمفونية مصرية مكونة من كونترباص شحتفه وكمان نواح

مع درامز لطم وخلفية اوبرالية لجاموسة محشورة فى ماسورة

------------------------------------

ولا يهمنا بنات مين هوه فيه احسن من معرفه الرجالة

الهى يا رب ان النيل هيلتون تعدى عليه البلدية ويلموا الكراسى

والعيال يتقبض عليهم من امن الدولة

او يحصل حادث ارهابى ويفجروه بس

البنات تبقى فى الحمامات ساعتها بيظبطوا ميك اب وكدة

بنات يا اللى لسه (Pre School) فى عالم النت

بنات يا اللى ماماتكوا قبل ما تنزلوا شييكووا على البامبرز بتاعكوا

لتكونوا عملتوا على روحكم بى بى

ده من خيبتهم واحد ضحك على واد من الادمن بتوع الرووم

وقعد يكلمه على انه بنت والافندى طب زى الجردل

وفى الاخر خلاه (Admin) على الجروب قام طرد كل(Admins)

وعمل نفسه (Super Admin) كمان

شفتوا (Admin) قروى ساذج قبل كده........

ده كمان دليل على ان الزمن ده كان زمن الاشتغالات

نظرا لان البنات ايامها كانوا زى ايه؟ لو نسيت اقرا البوست السابق من الاول

الحقد اللى ملئ قلوبنا كان نظرا لان الكومبيوتر ايامها ماكنش رخيص زى دلوقت

فالبنات اللى هيحضروا اكيد من مستوى اجتماعى بقى

لبس ايه وشياكة ايه وجمال ايه تركى يا لوسى

بعد تردد ....واحد افندى من اللى معانا قالنا انه اتعرف على بنت

وقالها على مقابلتنا وقالت احتمال انها تيجى

وساكت ليه يا عم الحاج من الصبح

قالنا يا جماعة انا مش متأكد

واحد رد قالنا تفتكروا لو جت وشافتنا كلنا كدة هتسلم وتقول هاى عادى كدة

كنا تقريبا عشر ولاد اعووووووووووووووووووووووووووووو

دى لو جت هتتنكر لنا وترجع بيتهم تانى

المهم اتنين منهم شافوا بنت جايه ناحيتنا قاموا راحوا يسألوها

ان كانت هى البنت اللى قالت احتمال والا لا

قالت لهم لا .................... اععععععععععععععععععععععععععععععع

و بكل احباط رحنا قعدنا على قهوة فى ميدان التحرير تتردد فى ودنا

اغنية عبدالوهاب " طول عمرى عايش لوحدى"

طب واحنا مالنا كنا قولناله يتنيل يعيش لواحده

اللى يخنق بقى ان واحدة شحاتة عدت علينا واحنا قاعدين

لا مش طلعت البنت اللى كان الواد بيقولنا عليها يا خفيف

دى جايه تشحت الساعة 11 بالليل وعلى راسها كيس

وبتقولنا " حاجة لله علشان اعشى العيال"

اضرب بعينى على الكيس الاقى فيه موز وتفاح

سيادتها معاها موز وتفاح ولسه عايزة تعشى العيال

كان نفسى ااقولها " اتبنينى الليلة دى ياتانت"

شحاتة وتقولها يا تانت

ايوة يابنى مش معاه موز وتفاح ده حتى تانت احتمال تنام خفيف الليلة دى

اشوفكوا البوست الجاى ان شاء الله

الـــرغــى وســنــيــنــه (1)

النهاردة محتاج اكل ساندوتش اى حاجة واشرب كابوتشينو

على حساب اى حد يا عالم يا بخلاء

الاخت اللى قاعدة تقرأ وتضحك هناك دى ما تقومى تدوقينا طبيخك

يمكن حد يتسمم نخلص منك ومنه.

فين ايام زمان اما كان شباب مصر النتيته مجتمعين على

قلب رجل واحد فى البحث عن اى تاء مربوطة على النت

بس تكون بلدى علشان المستورد بقى يعمل عسر هضم .

ايامها البنات المصريات كانوا اندر من ساندوتش كاندونال او ماكتاكى

مايجيبش تسمم .... اه يا بطنى يانى

واحنا كمصريين بنحب نشجع الصناعة الوطنية بعد اما زهقنا

من الاجنبى وسنينة ماهو النفس الحلوة لها الجنة برضة

واللى يقضيها حلو نفسه تموع لازم اى حاجة حرشة

ولو حتة جبنة قديمة من ايام الفراعنة

المهم كانت الجبنة القديمة ااقصد المصريات مش متواجدين بكثرة

واللى كانت بتدخل كانت تروح تتكلم فى الغرف الاجنبية

رضينا بالمش ودوده مش راضى بينا

طبعا عشان غلاسة المصريين وكمان تاخد راحتها فى الكلام

مش زى دلوقت اول ما جهازك يعمل ستارت اب

تلاقى بنات ادلدلوا من السماعات و خماشر ستاشر بنت طلعولك

على المونيتور وتجرى تعمل الماسنجر بتاعك Appears offline

قبل العالم الرخمة ما تشوفك وتبتدى صوصوت الماسنجر

تجبلك سيكوياما شيرى توتو والعياذ بالله

المهم بعد فترة من التدريب على الرغى فى الكوميك شات

ظهر بعده برنامج كان رخم شوية

اسمه الفيرشوال شات حاجة كدة هلامية معجبتنيش

لحد اما فى يوم من الايام زميلى اللى دلنى على موضوع النت

قالى على القنبلة التى اطاحت بعرش الكوميك شات

واصبحت من اشهر برامج الكلامنجية الا وهو ال MIRC

البرنامج كان نسخة متطورة عن الكوميك شات و من خلاله

ظهرت لتانى مرة فى عالم الرغى غرفة بأسم Egypt

على فكرة المرة الاولانية كنا احنا البيونييرز (Pioneers)

على الكوميك شات اول من انشاء غرفة بهذا الاسم

ولكن نظرا للماضى السحيقة ف ماكنشى لسه ظهروا المؤرخين اللى

يكتبوا عن هذا الحدث العظيم اللى يساوى ظهور شعبان صوت الجحيم

فى السى ان ان او فهم الطلبة لاسئلة امتحان فى ثانوى

المهم الغرفة بتاعة Egypt دى كانت بسم الله ما شاء الله

مليانة عيال بالهبل و الادمن ولاد اللذينة عملوا فكرة حلوة قوى

فكرة ايه؟

هاقولكوا بس المرة الجاية ان شاء الله

فــــــــــــــــــــــــــــــــــــاصـــــــــــــــــــل

انزل بتتر برنامج ماما عجوة وزقلط يا عم الحاج

ســـــــــــــــــــــــــــــــــــــــــــــــــــــــــلام

أول الحــكـــايـــات

بلغنى ايها التايه الحزين

ذو النت البطيئ أنه فى اواخر التسعينات

بدأ تايه الدخول هناك فى عالم النت

عالم الاساطير والناس اللى من مكانها تقدر تطير

وكمان بضغطه او ضغطتين يعملوا اوردرات فطير

وها هو تايه يقول انا جيت

☀☀☀☀☀☀☀☀☀☀

فى دنيا الفضاء التخيلية اللذيذة دى.اخنقكوا معايا وارجع بيكوا للتسعينيات

ايام النت لما كان بيشتغل بالفحم

مممم الماضى الرائع العريق الممزوج بطعم شاى الشيخ الشريب

وباكو سامبا بالشيكولاته البيضا

ايام اما كانت الكونيكشن اقصاها 10 ك ب.

والدخول كان بيتم عن طريق ارقام خاصة بمجلس الوزراء

ولو محظوظ يقع تحت ايدك اكاونت من بتوع الجامعة الاميريكية

يبقى ولى من اولياء الله الصالحين دعالك

اعرف واحد عمل دونلوود لويندوز 98 النسخة التجربية

قعد فيها اسبوع سايب خط التليفون مفتوح ليل نهار

كنت بجيب الجرايد كل يوم علشان اقرا " اب يقتل ولده بسبب التليفون"

لكن اتضح ان ابوه بيشتغل فى الخليج .تقريبا علشان يسدد فواتير التليفون للافندى

طبعا كان لازم يبقى لك اكاونت علشان تقدر تخش مش زى الهرجلة بتاعت دلوقت

الدخول كدة من غير لا احم ولا دستور كان فيه بروتوكول لدخول الحمام قصدى النت

ايامها المصريين كانوا كلهم اسكندرانيه (جدعان يعنى) مش عارف ايه جدع دى

(فى اللغة جدع انف فلان يعنى طيرها له) انت واد جدع افهموها بقى .

وانا عرفت ليه الاسكندرانيه بيتخنقوا من القاهريين بيفكروهم دايما انهم جدعان :)

المهم الاكاونت اللى يتعرف ينتشر على طول .

اعتقد مصر ايامها كانت شغالة بحوالى عشرين تلاتين اكاونت

كان فيه روح تعاون وايثار وكنا ماشيين بمبدأ

"الاكونت اللى ما توزعوش غيرك هايوزعوا فاعملها بجميله احسن"

انا لى صديق الله يمسيه بالخير هو اللى دلينى على موضوع النت

وهو اللى كان بيمدنى بالاكونتات علشان ااقدر ادخل

واصل الحكاية انى كنت بدرس فى المودرن اكاديمى

وكنت فى قسم الكومبيوتر ساينس

وكان لازم ولا بد اشترى كومبيوتر .

المهم كان ايامها كارت الشاشة ابو اتنين ميجا اوعى وشك

اخر تكنولوجيا انتجتها القريحة البشرية

وكان نازل معاه فيلم القناع بتاع الواد جيم كارى

وانا بقى كنت عايز اجيب الكارت ده عشان الفيلم

كومبيوتر وتشوف عليه فيلم - يا وحوى يااما اعدلونى على القبلة-

المهم زميلى ده قالى بلاش كارت الشاشة وهات كارت فاكس

علشان تدخل الانترنت .

المهم مين الانترنت دى يا خويا قعد يوضح لحد اما اقنعنى

كانت ايامها برامج التصفح الانترنت اكسبلورير والنيت سكيب

كانت ايامها محركات البحث ايه اوعى كان عندك altavista,lycos,infoseek

اللى جه بعدهم الياهوو واكتسحهم حاليا الجووجل

اما المزاج العالى بقى واللى خلانى احب النت برامج الشات وما ادراك

البداية مع برنامج اسمة الكوميك شات بيدخل على سيرفرات خاصة بيه

كانت عاملها ميكروسوفت مخصوص ومتوصى عليه

كان المصريين مايزيدوش عن عشرة منهم انا وصديقى

بعدها ظهر MIRC ثم ICQ واخيرا الماسنجر بتاع ميكروسوفت ثم الياهوو

وكان المصرى على الكوميك شات فاكهة الغرف هناك .كان يكفى ان الواحد يقول

hi , iam 21 m Egypt

والبرايفت شات يتفتح واتفرج على الكوميديا بقى لما واحدة تسألك وتقولك

" "do you have a camel?

ارد اقولها " طبعا واحدث موديل يا اختشى اربعة سلندر بفتيس غرز"

ولما الدنيا اتطورت شوية ودخل المصريين بقوة لاقتحام عالم الرغى

العيال العفاريت ما تعرفش عملوا ايه

بقى لما الناس تسمع كلمة مصرى يعملوا له kick

يضربوه شلوت بره اوضة الرغى يعنى

وكانت دى بداية الانهيار الحضارى والمكان العظيمة

اللى تبؤتها مصر بين امم الرغى على النت

بس احنا كشباب من البيونييرز مسكتناش واخدتنا الحمية الوطنية

وكمصريين اصلاء بقينا لما ندخل الغرف نقول بكل فخر...

"hi I am 22 m and I am not Egyptian"

و إن شاء الله لنا عودة