الـــسحـــاب الأبــــيــــض الجزء الرابع

سندوتشاتى الاعزاء

بعد اما البخلاء هربوا لما حسوا ان الموضوع تطور من اكلة وحاجة ساقعة

إلى محاولة للدفع النقدى كله شمع الفتله وخد ديله فى سنانه وفلق

فاليوم إلى كل قطع الطماطم اللى اندفنت مع الجبنة فى حضن الرغيف

وإلى اخر شفطة فى كانز شويبس جولد تروبيكا والمنتظره بشوق سماع الجزء ده

قبل ما تحصل اخوتها و قطمة قطمة اهديكم هذا الجزء

سى تايه انت اتجننت والا بتعمل اعلانات؟؟

وعندك واحد زلانكات خارصين للواد اللى بيسأل فوق ده يمكن ربنا يكرمه بتسمم ونخلص

بجد انا اتخنقت من الاسئلة الغتيتة دى

فور دمى اللى يتفور سقف بيته فى ليلة زمهرير قولوا امشير

المهم بعد الحدوتة اللى قولتها البوست اللى فات

قررت بعد فترة انى لازم اشوف السحاب الابيض

طبعا ده كان يستلزم انى ادخل فى حدوتة تانية جديدة عشان ااقدر ااقابلها وجها لوجه

طيب تتصرف ازاى يا تايه يا ابو التكاتيك (master of tactics)

شوفتوا اللغة اتعلموا حاجة بقى -عشان ماتفتكروش انها جمع توك توك

والتوك توك للى ما يعرفش هو الوسيلة المفضلة للقذافى

ويمكن ان تحمل بداخلة شمسية بالرغم انه مش كابورليه

ولكن ممكن نطلق عليه مجازا كابوريا من غير ليه والبعض يطلق عليه لفظ كوت كوت

لما فيه من الشبه بالكتاكيت

سيبكم من شغل الزفارة والعشش ده ونرجع لزنجا زنجا ثورة ثورة

الخطة كانت موضوعة بدقة واتنفذت بعناية

بيتر هايسافر اميريكا وقبل ما يسافر ساب مع اعز اصحابه

مجموعة كتب خاصة بتعليم الانجليزية والاسلوب الادبى الخاص بيها

وطلب من السحاب الابيض قبول الهدية المتواضعة دى واعتذر انه مش هايقدر يقدمها بنفسه

بس صديقه فيه الخير والبركة وخلى صديقه يرغى معاها على Mirc

وكان لازم بيتر يختفى من الصورة ويظهر تايه

بدأ تايه اللى هو صاحب الفخامة والسمو يرتب كيفية تسليم الهدية

اول مطب وقع فيه ان السحاب الابيض بمنتهى الذوق قالت

انه بدل ما يتعب نفسه ويسافر مخصوص ممكن يرسل الهدية مع سواق من بتوع السوبر جيت

وياخد اسمه ورقم الاتوبيس وميعاد وصوله للمحافظة اللى هى منها وهى تستلم منه الهدية

يا سلام على البنات لما يبقوا ناصحين ............. يشلوا

قال لها لا وانه كده كده مسافر ومفيش تعب ولا حاجة

وبعد كدة اتفقوا على ميعاد ومكان عشان يتقابلوا وهى قالت له انها هاتيجى مع اخوها

تايه قال مفيش مشاكل

كان الاتفاق انهم يتقابلوا على الساعة 7 فى محل مشهور

كمان اديتوه رقم تليفون البيت عشان لو حصل اى ظروف وكانت معرفة والدتها الموضوع كله

كلام جميل

فى اليوم الموعود قال يتأنق بقى.....

البنطلون خرج منه المحفظة والفلوس ورماه مع واد عمه القميص

وهات اللى على الحبل وبعد شاور وكوى الهدوم ورش البارفان لبس وعلى الساعة اتنين

نزل واتنطط فى مترو الانفاق ومنه على رمسيس هوب على البيجو وكان قدرى سعيد

ده مش اسم السواق يا ماما ده قدرى من القدر

وسعيد لانى كنت الزبون اللى فاضل عشان البيجو يكتمل ونتوكل على الله

قبل ما اركب استأذنت اونكل السواق انى اجيب شويه حاجات

روحت جيبت كانز بقى وبسكويت عشان ماكنتش لسه فطرت

دفعت الحساب ورجعت عشان اركب البيجو

ولكن حدث مالم اتوقع

حد يرقع بالصوت وشوية يلطموا

وانت يا اخت ياللى قاعدة هناك هاتى جبل التراب اللى هناك ده

و شيلى منه وحطي على دماغك واتوصى ادفنى نفسك يعنى

ايون مظبوط بس لسه مناخيرك باينه اهيه استنى هاسدها بزلطين

خبر ايه !!!!!!! ايه اللى حصول يا تايه بيه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

بطلع المحفظة عشان اجهز الاجرة مالقيتش الفلوس

اتارينى خرجت الفلوس من المحفظة فى البيت ونسيت اخدهم معايا وانا نازل

والساعة بقيت تلاتة ونص

اضطرت ارجع تانى البيت عشان اجيب الفلوس ورجعت للموقف تانى

المرة دى البيجو كان بيحمل بطيئ جدا والساعة قربت على خمسة ونص

بطلعوا العين السواق حمل وطلع على الطريق

واحنا على اول الطريق الافندى وقف رست عشان الناس تجيب ميه

وانا عمال اكلم السواق اللكعى وااقوله انى مستعجل وعندى مشوار مهم

واضطريت اسفا انى اديله ميه يشرب

ضرب بوزه فى الازازة وانا اصلا بقرف بس المهم نخلص

وبعد اما مشى يجيى ساعة على الطريق

البيجو اللى كان المفروض هايحمل بعدنا عدانا وسبقنا

والسواق العجيب اللى كنت راكب معاه كان مستغرب جدا

من السرعة الجنونية اللى كان ماشى بيها زميله ده

انا كنت اخدتها مشى اسرع

مش بقولكم صوتوا

اشوفكوا البوستات الجايه

الـــسحـــاب الأبــــيــــض الجزء الثالث

النهارده انا متغاظ منكم وطلعتوا صحيح عالم بخلاء

بقى يفصلوا عنى خدمة النت عشان نسيت ادفع الاشتراك ولا حد منكم يعمل مظاهرات

اواحتجاجات ولا تعتصموا فى التحرير ولا حد سأل وقال فينك يا ابو التوهان

طب بلاش دى الا ما حد فيكم قال نلم لسى تايه ونسدد عنه الاشتراك الشهرده

جرى ايه يا سى تايه بيه الا هى حسنة وانا سيدك والا ايه؟

اخرسى يا خنزاؤوره

مكانش العشم ....

عموما قعدة افلام الكارتون اليابانية هونت عنى شوية الم البعاد عن النت

اكيد عدت عليكم فى حياتكم حلقات كرتون حبتوها زى مازنجر

والا جريندايزر والا كوكى العجيب او ما شابه

الحلقات دى كلها انيمى يابانى مدبلج بالعربى انيمى دى اختصار ل (animation)

المهم

فى فترة الدراسة فى الاكاديمية كان لى اصدقاء من سلطنة عمان واهل عمان مشهورين بالطيبة

كان منهم زميل يعشق البلاي ستاشن والكارتون اليابان وهو كان السبب

فى انى ارجع اتفرج على كارتون يابانى مترجم للانجليزية

ايه علاقة ده بالحدوتة ورد فعل السحاب الابيض عليها ..!!!!؟

ما تلخص وتخش فى الموضوع وبلاش لت وعجن قرفتنا فى عشيتنا

طب قسمنا عظما على الحلال بالتلاتة لو ماسكتوا لانزل بفاصل ها ؟

قلتوا ايه ؟ بس ولا كلمة ولا نفس ولا حرف ... ليكوا عين تتكلموا

بس عشان خاطر الانسة الرقيقة الامورة اللى عنيها سهتانه دى ها كمل

وعدى يا وعدى J بونجورنوا سانيوريشه

معروف ان البنات بتحب قوى تسمع قصص رومانسية وحبشتكنات من دى

وعشان تعرف مدى رومانسية او واقعية البنت احكى لها حدوتة ورد فعلها هو اللى يبين

بيتر سألها اذا كانت حبت قبل كده قالت له لا ابدا

ردت على سؤاله بنفس السؤال

قالها ايوة وكعادة البنات كانت عايزة تسمع الحكاية

وبدأ بيتر الحكاية

كان خارج من قصة حب منتهية وكان مجروح

والحياة بلا معنى

وفى حفلة من حفلات الدبلوماسيين اتعرف على بنت السفير اليابانى فى امريكا

اثناء الاجازة السنوية اللى كان بيتر وعائلته بيقضوها فى امريكا

بنت جميلة رشيقة زى الفراشة ابتسامتها الساحرة لا تفارقها وعندها غمزات كمان J

لاحظت عليه الحزن قربت منه

وفتحت معاه حوار كان بسيط وهو ما كنش عايز يتكلم مع حد رايح كدة من غير نفس

وبشوية كلام دبلوماسى ابتدى يرد عليها

عنيه ماكنتش شيفاها

وعقله ماكنش فى الحفلة ولكن فى عالمه الحزين

لكن هى اتأثرت بحزنه البادى فى عنيه واصرت تقرب منه عشان يفتح قلبه

يومها اتكلموا شوية عن البلاد اللى زاروها وعادات الشعوب فيها

خرجتوا شوية من الموود وسألته اذا كان زار اليابان والا لا

قالها لا قالت له يبقى لازم تزورها. كمان اتكلموا عن الدراسة واحلام كل واحد منهم

وتبادلوا ارقام التليفونات وهو اصلا ماكنش مهتم ولا كان شايفها من الاساس

لكنها اتصلت بعد كام يوم وفكرته بنفسها

واتكلموا كتير وبقوا اصدقاء وخرجوا مع بعض

ابتديت عنيه تفتح وتشوف الانسانة دى

اتكلم كتير عن نفسه وكانت بتسمعه ومش بتتريق عليه زى اصدقائه

قلبه ابتدى ينبض من جديد بحب خايف انه ينكسر زى ما انكسر قبل كده

حاول يتجاهل المشاعر دى ومقدرش

وفى لحظة قالها انه مستعد يموت لاجلها ولكن مش مستعد يعيش بقلب تجرحه

يا تكون بتحبه ومش تقدر تعيش من غيره زى ما بيحبها يا اما ينتهوا عند الحد ده

قالت له ان اهتمامها به مش مجرد صداقه وانها زيه كمان مش تقدر تكتم مشاعرها

ولما جه ميعاد رجوعه وعائلته للقاهرة اتفقوا ان اول اجازة يتقابلوا فى اليابان

وبقوا على اتصال يومى

لحد اما فى يوم والدها كلمه وبلغه انها توفيت فى حادث تصادم

قعد فى غيبوبة اسبوعين

وقال للسحاب الابيض ان اكتر حاجة زودت الالامه انه مقدرش يشوفها لاخر مرة

طبعا هى اعتذرت انها فكرته بشيئ محزن زى ده

كمان بعت لها تتر النهاية لكارتون يابانى .. انا ادعيت طبعا ان حبيبه بيتر بعتتهوله

بصراحة التتر كان اغنية رومانسية جدا بالرغم انى ماكنتش فاهم منها حاجة

بس كانت تتحس

تعرفوا رد فعلها كان ايه

راحت قدمت فى كورس تعليم يابانى فى المركز الثقافى اليابانى

ده اللى عرفته منها بعد فترة بعد اما اكتشفت انى ولا امريكانى ولا حاجة

وهى اكتشفت ازاى

بصراحة دى قصة قمة قمة الغرابة

محصلتش ولا هاتحصل متهيألى

حاجات كتير فى الحقيقة اغرب من الخيال

يكفى ان القصة بتفاصيل مختلفة تحصل فعليا متسألوش ازاى لانى مش هاجاوب

خلينا مع السحاب الابيض احسن

اشوفكوا المرة الجاية على خير ان شاء الله

مستنى تعليقاتكم

الـــسحـــاب الأبــــيــــض الجزء الثانى

الصراحة انا مش عارف اركز لانى فرحان وزعلان وعطشان بس الحمد لله مش جعان

لانى لسه متغدى من شوية ادينى وفرت عليكم غداء وساندوتشات يا عالم يا بخلاء

بس مش ممكن اتنازل او اتنحى عن طلب الحاجة الساقعة :)

و انا مدرك ان الاسابيع اللى فاتت كانت عصيبة ولكن وحدت الشعب المصرى الصراحة

وحدته فى التفليس و فى الانتصار على الطاغية اللى كان حاكمنا

انا فرحان لانى تاريخى اصبح جواه حدثين عالميين وصول مصر كاس العالم سنة 90

وبرغم الماتش التاريخى مع هولندا الا ان الجوهرى نكد على اللى جابونا

فى الماتشين اللى بعده وابقوا خلوا العيال تعمل بي بي على قبرى لو شمينا كاس عالم تانى

ثم بفضل الله وكرمه نجاح ثورة الشعب والترتيب هنا ترتيب تاريخى وليس ترتيب اهمية

وزعلان على شهداء الثورة الشباب اللى زى الورد وبدعو ربنا انه يتغمدهم برحمته

كمان زعلان ان خطاب الرئيس المخلوع قبل ما يمشى جاب للشباب المصرى عقم

وفيه ستات حوامل سقطت غير الاغماءات والسكتات القلبية والدماغية والجلطات

اللى نزلت على الشعب زى الوبا بتاع اختنا هنادى

وبقول للى اتجوزت او لسه متجوزتش تترحم على شبابها وشيخوخيتها

لاننا بقينا شباب فله وربنا يعوض عليكم و علينا

بس كان رد الشباب على الخطاب رائع واتعامل مع الحدث بشكل مصرى حضارى شعبى

انه رفع له بوز الجزم وده فعلا اللى كان يستحقه

المهم نرجع لمرجوعنا

لما ابتديت ارغى مع السحاب الابيض طقت فى دماغى فكرة شلوذعية

حاجة كدة باسميها تنكر وانتوا بتسموها كذب اخص بقى دى اخرتها

تنكر هو انت اشتغلت بلياتشوا يا سى تايه بيه

اخرس فلاح سيس ادب يوك

غيرت شخصيتى و اللغة الانجليزية كانت كويسة ساعتها قبل الله يرحمها

ما تروح فى الزهايمر المهم بعد هاى وماى وانت مين يا شابة او يا ياض

طلعت بنت من محافظة بعشقها و من منطقة مستوى كمان

والدها صاحب مصنع وكان واضح من طريقة الكلام والرغى انها بنت بغض النظر

اذا كانت متنكرة فى شخصية تانية زيى والا لا

وكانت بتدرس فى كلية نظرية هناك و من طريقة حوارها اكتشفت انها طيبة جدا

طب وانت يا تايه يا بيبى يا روح قلبى شخصيتك كانت ايه

عشان خاطر عيونكى الدوبالى مش هاعمل فاصل وهاقولك

اخترت اسم كنت اصلا عامل بيه ايميل الا وهو بيتر نورمان

وحكيت لها قصة عن عائلتى ان الوالد اميركى من اصل ايرلندى وان الام امريكية يهودية

انعم واكرم والاتنين بيشتغلوا فى السفارة الامريكية فى القاهرة

وانى بدرس كومبيوتر فى الجامعة الامريكية

يخرب بيت شيطانى ايه اللى اخترعته ده مش عارف

المهم ان اللغة الانجليزية ولله الحمد كانت ضعيفة شوية عندها

ف طريقة كتابتى اقنعتها بانى اميركى وكنت بتصرف كأنى اميركى

يعنى مكنتش برخم واغتت فى شيئ اللى تحب تجاوب عليه اهلا وسهلا

واللى متحبش يبقى forget it

يعنى على سبيل المثال طلبت اشوف صورتها فاعتذرت باسلوب لطيف

كنت ساعات ابتكر حواديت عشان اعرف شخصيتها من ردها ورأيها

و اكتشفت انها انسانة رائعة وفوق الوصف

منها حدوتة اخترعتها وكان رد فعلها عليها شديد الغرابة

حدوته ايه ؟؟؟؟؟

اشوفكوا المرة الجاية