رخــامــة

اصدقائى البخلاء

واحنا اصحاب كدة افتراضين مش المفروض انكم تسألوا عليا بقالى فترة غايب

حتى فى عالم الاوهام مفيش حد بيسأل !!

يبقى ليه نشتكى الواقع واحنا فى الخيال منسيين

المهم مطولش عليكم لانى شايف فى عنيكم النوم

واللهم طولك يا روح

الدنيا بتأخد الواحد وانا نسيت نفسى مع السياسة والخناقات والانتخابات

ومن غير ما اسأل اسئلة بايخة انتخبت مين وكدة

لو انت من الاخر تبع شفيق يبقى ربنا يشفيك

ولو انتخبت مرسى يبقى ربنا يقوينا ويقويه

وانا قاعد النهاردة لا بيا ولا عليا والنت فاصل بقالوه يومين

لانى كالمعتاد طنشت ادفع الفاتورة لحد اما فترة السماح راحت

طقت فى دماغى ابص على فولدرات مهملة بقالها سنيين

يجى كدة من 10 او 15 سنة وقلت اكتب لكم بوست جديد

قبل ما اغطس تانى لان موود الكتابة رايح منى

افتكرت قد ايه كنت رخم خصوصا فى المناقشات والمجادلات فى الدين

بما انى كنت دودة كتب وبحب كتب مقارنة الاديان لانها بصراحة

كنز فى شرح العقائد وبتتكلم بالفلسفة والمنطق

وانا اصلى اعز التفكير والمنطقية والكلام الكبير ده

اتذكر لما عرفت ايميل صحفية فى جريدة انجليزية كتبت عن احداث الكشح

وكانت خيالية جدا دخلت قريت المقالة لقيتها بتتكلم عن قتل و صلب المسيحيين

وحرقهم احياء على ابواب البيوت وحاجات ماوراء الطبيعة

بس وقمت مشمر وكاتب لها اللى فيه النصيب بس بالادب

عبرت لها عن كم الجهل والجهالة اللى هى عايشة فيها

وانها متعرفش اصلا فين الكشح دى على الخريطة

وانها تبطل تتفرج على بوجى وطمطم النسخة الانجليزى عشان بوظت دماغها

ماكنتش اعرف بقى ان العالم دى مش بتكبر دماغها وتهمل رسائل القراء

زى ما بيحصل دلوقت

يعنى مثلا رئيس تحرير جريدة ثقيل على موقع الجريدة الالكترونى قبل التطوير

قفل فى صفحة مقالاته التعليقات عشان الناس كانت بتظبطه صح

و طبق المثل الخالد الباب اللى يجيى لك منه ريح سدوه واستريح

اما الوليه الصحفية الانجليزية اللى تنشك فى حواجبها

ردت فى المقالة اللى بعدها بالتلميح على ان فيه ناس اتهمتها بالجهل

وانها ماتعرفش خريطة مصر واكدت ان بوجى وطمطم الانجليزى

هو ترجمة صادقة لحياة جدها وجدتها وانه مش شغل خيال

(طبعا بوجى وطمطم دى زيادة من عندى يعنى احسن تصدقوا)

ماتابعتهاش بعد كدة لانها تقريبا انتحرت او اعتزلت الكتابة

وافتكرت ايام الرغى اما كنت بدخل على غرف الاديان الانجليزية

على الام اى ار سى ماكنش لسه ساعتها ظهر البالتوك

وادخل فى مناقشات فى العقيدة وما شابه

اللى كل اما افتكره ابتسم انى ناقشت واحدة فى ذات المرات

ولما ما عرفيتش ترد عليا قعدت تهرتل وتقولى انت الشيطان

وانت مش عارف ايه ومت يا عفريت مت يا شيطان

المهم انا بقى كل شويه اديها كلمة والوليه تتهبل اكتر

لقيت واحد فتح معايا برايفت شات يقولى انا زوج الوليه اللى انت بتكلمها

وانها متعصبه جدا وانه خايف عليها يجلها اللهم اكفنا الشر استحلز

وانها بتربى يتامى وكلام الصعبنيات ده وبصراحة طلب بأدب انى ما اردش عليها

قلت له والله انا ساكت بس هى اللى مش ساكتة

وان النقاش كان عادى ومش عارف هى ليه اتعصبت

بعد كدة اكتشفت انى انسان رخم

صحيح اصدقائى كانوا بيقولوا عليا كدة بس انا ماكنتش مصدقهم

انتوا عارفين الشباب مع بعض بقى دايما كل واحد وله صفة

بشهادتهم يعنى انا ولله الحمد انسان وطبيعى

لان الرخامة من عاهات البشر وليس الحمير

بس ده ماكنش رأى اصدقائى بس

لكن دى كانت اول كلمة نطقت بيها زميلة لما بدأت شغلها معانا فى الادارة

كل ده عشان ايه

الكوتشى اتبل ميه من تحت

وكنت بخبط الكوتشى فى ارضية الكوريدور عشان انشفه من البلل فيعمل صوت صرير

زى ارضية ملاعب كرة السلة الصراحة الصوت كان عاجبنى

ولما لاقتها حطت اديها على ودنها وبصت ناحيتى وشكلها كان متضايق

الصراحة اتكسفت ووقفت وبطلت وبصتلها وابتسمت للحظات وهى ابتسمت

بس وقمت كملت خبط و صرير بقى

فيها حاجة دى ؟؟؟؟

اشوفكوا بخير

فى ذكرى المدعوقة تيتانيك

اعزائى الرومانتكيين

بعد اما غرقت بالسلامة تعود اليكم فى غرقها الجديد المدعوقة تيتانيك ثرى دى

يعنى مش دى دى بس لكن دى دى دى

بالرغم من ان اغنية مزمزيه شيلين " قلبى سيواصل " كانت احد عوامل تسويق الفيلم

وانا سخصيا كنت بحب الاغنية دى ......بس انا مادخلتش الفيلم ده تصوروا

وما اشتريتش بوسترات الفيلم زى العالم اللذوذة

ولا جبت شنطة عليها جاك وروز فى الفلانتين والاغنية نزلتها من على النت

من ساعة اما عرفت النت وانا وقتها لا اشترى شرايط كاسيت

ولا ادفع اشتراك للنت كله مجانا يا بشر ده كان قانون تايه

بس دلوقتى كله راح كل اتدمر على رأى الفنان تانى شاكك

من اتناشر سنة اتعرض فى السينما الفيلم المؤثر ده وكانت حكايته حكاية

العيال اصحابى دخلوا الفيلم وماكنتش معاهم .... كنت مشغول

ولما رجعوا واحد منهم حكى لى اول ما بدأ الكلام

قال لى ان اللى خارجين مناخرهم حمرا

مستوعبتش الكلام قلت له هما كانواعلى ضهر كوز الايس كريم اللى خبطته تيتانك والا ايه

بص لى وضحك قالى ان كل الناس كانت خارجة بتعيط

عشان كدة مناخرهم كانت حمرا

قلت له ايه التفاهة بتاعت البشر دى

لقيته ضحك وشاور على واحد صديقنا وقالى

الافندى ده كمان مناخيره كانت حمرا

طبعا انا ماسكتش بلسانى الطويل ولما ابتديت ااقل ادبى قالى

والله انتوا ما عندكوا دم

المشهد الاخير والواد " جاك كمباك " بيغرق يخليك

مش تقدر تمسك نفسك

قلت له استرجل ياض الكلام ده خليه للبنات مش للرجالة

اسفوخس على دى صحوبية تعر

كمان قالوا لى ان الافندى العاطفى كان هايتخانق مع الست اللى كانت قاعدة قدامة

لانه مش بيعرف يقعد عدل زى الناس

ركبته لازم تلزق فى ضهر الكرسى اللى قدامه وطول الفيلم

عامل يحرك "بضم الياء والراء" زى اللى عنده جرب

كل شوية يعدل من قعدة فيحرك نفسه وركبته اللى لزقة فى ضهر الكرسى

والست تلف رقبتها زى البومة 180 درجة تبص له بقرف وتنفخ من الغيظ

والافندى قمة التناحة والبرود ومبطلش هرك "بفتح الهاء"

وكانت هاتحصل خناقة لولا ان ربنا ستر

ولاننا اصدقاء والافندى العاطفى ده كان واحد من الاتنين اللى كانوا معايا

فى معرض الكتاب وراجعوا الحكاية اياها فى البوستات اللى فاتت

اتردت بس فيا انا لما دخلنا بعدها بكام سنة فيلم الناظر

كانت قعدتى السودا قدام عيال جم يذاكروا الفيلم عشان تقريبا كان هايمتحنوا فيه

حرقوا ام مشاهد الفيلم لانهم كانوا بيحكوا المشهد اللى جاى مقدما بافيهاته

المهم

طبعا تيتانيك حقق مكاسب كبيرة واخده له بتاع جرارين جوايز

لكن حكايتى معاه مختلفة

انا شوفته فيديو والمشهد اللى خرج كل الناس بتبكى

خلانى وقعت على الارض من الضحك

مش عدم وجود دم فى شرايين حضرتى ولكن لإن

روز طلعت اصيلة واول ما جاك كمباك بدأ يغرق

قالت من غير ما تأخدوا بالكوا

يالا فى داهية ده حتى كان حرامى ونصاب

اتفوووه على معرفته

لما قريت عن كيفية تصوير الفيلم عرفت قد ايه الناس دى بتعرف

تطلع الجنيه من بذر العنب

الفيلم اتصور فى حمام سباحة

مخرج الفيلم كان بيشتغل فى الاول سواق نقل

مكدبش اللى قال صحيح شغل امريكانى

اشوفكوا بخير

ومضات من ايام حياتى (1)

اعزائى اصدقاء تايه

تجرى الامور بمقاليد وتيسير الله سبحانه وتعالى وكل شيئ عنده بمقدار

اشكركم على مشاركتكم الوجدانية وتعازيكم التى كان لها اثر بالغ فى نفسى

كم شعرت بدفئ الاخوة الذى اخرجنى من احزانى

اسأل الله العلى العظيم الا يريكم مكروها فى عزيز لديكم.

------------------------------------------------------------------

احيانا كثيرة ترغمنى رأسى على العودة الى سنين الطفولة والمراهقة

ارتشف من رحيق الذكرى ايام رسخت واثرت بى وبمسيرتى فى الحياة

كما تداعب نسائم اوائل الشباب وبداية دخولى الانترنت ستائر مخيلتى

 

احداث مزجت خبراتها وتجاربها فصنعت بى الكثير

اتذكر يوم اشترى لى والدى رحمة الله مجلة سمير لما رأيتها عند بائع الجرائد

بعد ظهر احد ايام السبت وكنت فى سنين عمرى الاولى لا اعرف وقتها لا القراءة ولا الكتابة

فصرت مدمن للقراءة والكتب والمجلات حتى ان والدتى كانت تختلس بعض كتبى

وتدسها لاحد اقاربى او لبائع جائل حتى تتخلص من ركامها

كم كانت تخشى من ثورتى لان كتبى لحمى ودمى وكم كان لحمى ودمى مبعثرا باركان البيت

تذكر يوم خرجنا انا وعائلتى  الى أحدى الحدائق

وطلبت من ابى طلب ورفضه فاختبأت خلف نبات مرتفع قليلا على مقربة منهم ولم يلحظوا

وبعد فترة ظنوا اننى توهت فانتفضوا جميعا للبحث عنى ورأيت من مكانى كم فزعوا لاختفائى

وابتسم عندما اتذكر ما نلته من علقة ساخنة حين القوا القبض على المجرم الصغير

 

" حضرتى".

اتذكر اول يوم لى فى المدرسة واختى الكبرى تعطينى التعليمات ان انتظرها عند نهاية اليوم

لانى صغير على ان اعود لبيتى بمفردى وكانت المسافة بعيدة ونسيرها على الاقدام

ولانى وجدت نفسى فى نهاية اليوم وحيدا فى حوش المدرسة وقد كان ميعاد خروجى

 

قبل ميعاد خروجها ولأنى لم اعد صغيرا فأنا حوالى ست سنوات يعنى راجل قد الدنيا

استوحشت المكان فرجعت الى البيت على اثر ما انطبع فى ذاكرتى من مسارات الطريق

وكم ابتسم عندما اتذكر عودتها باكية باننى توهت وانها لم تجدنى

فقالت لها والدتى مهدئة من روعها اننى عدت سالما بفضل الله

فقامت الى تضربنى وانا اهرب منها لاختبئ تحت احدى الكنبات

اتذكر اول عدسة مكبرة صنعتها من خلال تفريغ احدى اللمبات الكهربائية وملأها بالماء

وكنت فى اولى ابتدائى يعنى عبقرى من يومى بس مصر ما بتهتمش بالنوابغ

ايام الضحك والضحك ولم يكن هناك احزان
----------------------------------------------------------------------------

لعله بوست قصير خارج عن نطاق مسار تايه

ولكن اعرف كم سوف تتحملونى اصدقائى الاعزاء

جعل الله ايامك سعادة ودمتم بالخير.

اقدار

علمتنى الدنيا انها اذا حلت اوحلت

انتقل الى رحمة الله تعالى والدى فى يوم الخميس 26 يناير 2012

بعد اسبوع من ذكرى يوم ميلادى بالضبط

إنا لله وإنا اليه راجعون اللهم اغفر له وتجاوز عنه واسكنه الفردوس الاعلى

ولا حول ولا قوة الا بالله العلى العظيم. نسألكم له الدعاء

تدوينة خاصة ----- اليوم العالمى للفرحة والبهجة

التاسع عشر من يناير يوم تاريخى وفاصل ومفصلى فى تاريخ الانسانية

فاليوم هو

يوم عيد ميلادى يا بـــــــــــــــشــــــــــــــــــــــــــــــــــــــــــــــر

صفافير وتشجيع وتورتات

فليفرح العالم بهذا اليوم

ايسلين - توتة توتة فرغت الحدوتة

اعزائى وعزيزاتى اصدقاء ببليوجرافى رحلة تايه النتيه

مساءكم سعيد وعام جديد يارب يبقى نهاية لاحزان كتير وبداية لاستقرار وتحقيق احلام

يتوقع خبراء الارصاد منتصف هذه الليلة سقوط زجاجات المنكر من السيارات المحملة بالاوغاد

ف على السادة اللى هاينزلوا الشارع بعد منتصف الليل ارتداء الملابس الواقيه من الرصاص

قبل ما اكتب هذا البوست رجعت لهدايا ايسلين

كلها موجودة ما عدا الجواب اللى كان مكتوب على كارت معايدة

وقعدت اتذكر الكلام

افتكر ان اوله بدأ بجمله " برغم ان بيننا مسافات شاسعة الا انى احس انك قريب منى"

" برغم اننا لم نتقابل وجها لوجه الا اننى اشعر بانى اعرفك منذ زمن بعيد "

فيه جمل كتير نستها لكن مازلت متذكر توقيعها و كتابتها لكلمة "احبك " باللغة الصينية

كمان كان فيه مطوية صغيرة جدا بتحكى قصة نشأة سينجابور و رمزها رأس اسد وجسم حصان البحر

و المنديل اللى لونة كحلى وعلية رسم لرمز البلد و دبوس صغير بنفس الشكل كان ملحق بالكارت

اما الصورتين فكانت لها فى اماكن مختلفة اثناء كورس تبع شركتها لالمانيا

يوم عن يوم كنا بنقرب لبعض اكتر

وكنت بستنى وقت دخولها ع النت .... وخلاص بقى كبرت دماغى من الدراسة

ماكنتش بروح وعلى وشك انى اسقط لاول مرة فى حياتى

يعنى تضحية بسيطة لاول بنت حبتنى فى تاريخى

اهو بدل البهدلة اللى اتبهدلتها من بنات بلدى

برغم ان اول بنت اتمشت معايا ووصلتنى لحد بيتى

اه هى اللى وصلتنى لبيتى كنا فى تانية ابتدائى

واول بنت عقدتنى فى حياتى من غباء البنات كانت فى سنة خمسة ابتدائى

ولد متخلف كتب لها جواب وبعتوه معايا وقالى ان زميل تانى هو اللى كاتبهولها

والسبب انهم واقفين بوابيين فى اليوم ده على باب مدير المدرسة تحت بند الحكم الذاتى

على اساس ان المدرسة اعلنت الاستقلال عن الادارة التعليمية

المهم فتحت الورقة لاقتها جواب حب عينى يا عينى

المهم اخدت الورقة واديتها للبنت وقلت لها تنزل لمدرس الفصل تبلغه بالموضوع

مدرس الفصل الله يعمر بيته ضربنى علقة بنت حلال

يعنى ضرب اتنين مظاليم مع الواد اللى كان السبب

وطلب استدعاء لولى امره عشان يلموا الفضيحة

الواد اصلا ابوه صعيدى مش عارف ليه متخيل ان ابوه فرح ان ابنه بقى راجل

وعايز يفتح بيت ويبقى اب وهو فى خمسة ابتدائى

واخيرا فلح فى العلام وبقى يكتب جوابات غراميه

ده غير حادثة معرض الكتاب اللى اتظلمت فيها وماكنش ليا فيها ناقة ولا جمل

كنا فى الاعدادية ورحنا معرض الكتاب انا واتنين اصدقائى

مجموعة بنات كانت بتتعاكس من مجموعة صبيان

راحوا جابولهم العسكرى

العيال مشيوا واتارينا قعدنا مكانهم

البنت المعمصه اللى فيهم جات وشاورت عليا وقالت للعسكرى " هو ده اللى ادانى الكارت "

والعسكرى يقولى " مش عيب عليك انت مالكش اخوات بنات " والاسطوانة دى

وانا من الصدمة عمال ابتسم ومش عارف

طب ننضرب والا نتهزق بسبب بنت جميلة ماشى برغم انى بحترم نفسى جدا

لكن كل مرة تطلعى لى قردة تلبسنى فى الحيط حرام بقى

والاندال اصدقائى عملوا ميعرفونيش واللى عمل نفسه بيقرى فى جرنال واللى ادانى ضهره

مفيش غير واحدة ست اللى انقذت الموقف وقالت له دول لسه جايين دلوقت

والبنتين القمامير اللى فيهم قالوا لبعض لا مش ده

وانتهى الموقف العصيب

من يومها كرهت ام البنات وبالاخص الاغبياء منهم والاكتر الوحشين

المهم عشان ماتتهوش زى ما انا تهت

ايسلين غيرت فكرتى عن البنات

وعرفت ان فيه نوعيه تانية عارفة معنى الرقة ورهافة المشاعر

مش ال L'mere d'ghoul

اللى ضحكوا علينا ايامها ويقولوا عليهم بنات

المهم كفاية كدة عشان شايف ناس عنيها احمرت وبدأوا يزمجروا ويكشروا عن انيابهم

مشكلتى مع ايسلين كانت فى شقين

المعتقد الدينى لانها كانت كونفوشيسية وتانى حاجة بعد المسافة

وانا ايامها كنت بدرس وماكنتش اقدر اوفر مصاريف سفر عشان ازورها

ولا دلوقتى حتى عشان اكون صريح معاكم

المهم طلبت منها بما انها بتقبض على قلبها قد كدة

انها تقوم بالخطوة الجريئة وتزور مصر

اهو منها سياحة ومنها تتفرج على اثر نادر من اثار مصر اللى هو انا

طلع لى فى البخت ابوها اللى رفض باصرار انها تسافر

عشان حوادث الارهاب اللى حصلت خلال فترة التسعينيات

وانا من ناحيتى بكل شهامة قلت لها ان استمرار مشاعرنا بالطريقة دى يعد استهلاك فى غير محله

لا هى هاتعرف تيجى ولا انا هاعرف اسافر لها

المستقبل غامض بالنسبة لنا

المهم انفصلنا بالتدريج

بعدها بفترة بعت لها ايميل اسأل عليها

لاقيتها اتجوزت واستقرت فى حياتها

تمنيت لها التوفيق واختفت زى اللى اختفوا

بس سابت ذكرى لواحدة من اجمل الفترات فى حياتى

سبتكوا بالعافية