الأحد، 16 يناير، 2011 | By: همزة

الـــرغــى وســنــيــنــه (2)

اعزائى البخلاء الا ما حد عبرنى بكوباية ميه حتى ابل ريقى

من البوست اللى فات وانا مستنى اى عزومة بس للاسف كلها عزومة مراكبيه

الا ايه عزومة مراكبية دى يا معلم تاية

ااقولك ياض

الاخوة المراكبيه لما يتقابلوا فى وسط البحر يقوموا يسلموا ويعزموا على بعض

ويشدوا قوى فى العزومة قلبهم ميت الناس دى والا ايه

يعنى اكيد مش هايغرقوا المراكب عشان خاطر السلامات

واكيد يعنى مش هايرموا نفسهم فى البحر عشان خاطر كوباية شاى بتلاتة تعريفه

ايه الغباوة دى

الا لو كانت عزومه على اسبريسو فى ايطاليا وبالمرة شغلانه

كنا بنقول ايه اه نكمل الحكاية بس اقرا اللى فات عشان تواصل مع اللى جاى

بعد فترة اتعرفنا على شباب نتاوية عن طريق ال MIRC

وفى يوم اتفقنا اننا نتقابل قدام النيل هيلتون

المهم اتقابلنا واتعرفنا على بعض وجها لوجه

واحد منهم قالنا ان العيال بتوع Egypt هيتقابلوا فى نفس اليوم

بس جوا النيل هيلتون

وان المقابلة فيها بنات من نفس الرووم

- مــوســــيــقى تــصــويــتــيــة -

لسيمفونية مصرية مكونة من كونترباص شحتفه وكمان نواح

مع درامز لطم وخلفية اوبرالية لجاموسة محشورة فى ماسورة

------------------------------------

ولا يهمنا بنات مين هوه فيه احسن من معرفه الرجالة

الهى يا رب ان النيل هيلتون تعدى عليه البلدية ويلموا الكراسى

والعيال يتقبض عليهم من امن الدولة

او يحصل حادث ارهابى ويفجروه بس

البنات تبقى فى الحمامات ساعتها بيظبطوا ميك اب وكدة

بنات يا اللى لسه (Pre School) فى عالم النت

بنات يا اللى ماماتكوا قبل ما تنزلوا شييكووا على البامبرز بتاعكوا

لتكونوا عملتوا على روحكم بى بى

ده من خيبتهم واحد ضحك على واد من الادمن بتوع الرووم

وقعد يكلمه على انه بنت والافندى طب زى الجردل

وفى الاخر خلاه (Admin) على الجروب قام طرد كل(Admins)

وعمل نفسه (Super Admin) كمان

شفتوا (Admin) قروى ساذج قبل كده........

ده كمان دليل على ان الزمن ده كان زمن الاشتغالات

نظرا لان البنات ايامها كانوا زى ايه؟ لو نسيت اقرا البوست السابق من الاول

الحقد اللى ملئ قلوبنا كان نظرا لان الكومبيوتر ايامها ماكنش رخيص زى دلوقت

فالبنات اللى هيحضروا اكيد من مستوى اجتماعى بقى

لبس ايه وشياكة ايه وجمال ايه تركى يا لوسى

بعد تردد ....واحد افندى من اللى معانا قالنا انه اتعرف على بنت

وقالها على مقابلتنا وقالت احتمال انها تيجى

وساكت ليه يا عم الحاج من الصبح

قالنا يا جماعة انا مش متأكد

واحد رد قالنا تفتكروا لو جت وشافتنا كلنا كدة هتسلم وتقول هاى عادى كدة

كنا تقريبا عشر ولاد اعووووووووووووووووووووووووووووو

دى لو جت هتتنكر لنا وترجع بيتهم تانى

المهم اتنين منهم شافوا بنت جايه ناحيتنا قاموا راحوا يسألوها

ان كانت هى البنت اللى قالت احتمال والا لا

قالت لهم لا .................... اععععععععععععععععععععععععععععععع

و بكل احباط رحنا قعدنا على قهوة فى ميدان التحرير تتردد فى ودنا

اغنية عبدالوهاب " طول عمرى عايش لوحدى"

طب واحنا مالنا كنا قولناله يتنيل يعيش لواحده

اللى يخنق بقى ان واحدة شحاتة عدت علينا واحنا قاعدين

لا مش طلعت البنت اللى كان الواد بيقولنا عليها يا خفيف

دى جايه تشحت الساعة 11 بالليل وعلى راسها كيس

وبتقولنا " حاجة لله علشان اعشى العيال"

اضرب بعينى على الكيس الاقى فيه موز وتفاح

سيادتها معاها موز وتفاح ولسه عايزة تعشى العيال

كان نفسى ااقولها " اتبنينى الليلة دى ياتانت"

شحاتة وتقولها يا تانت

ايوة يابنى مش معاه موز وتفاح ده حتى تانت احتمال تنام خفيف الليلة دى

اشوفكوا البوست الجاى ان شاء الله

19 التعليقات:

MOROOOO يقول...

هى صورة الكلبين دول ورايا ورايا :((

لسه كنت بمتحن فى مادتها انهارده

بس سيبك انت البوست حلو أوى

أسلوبكـ جميل أوووووووووووى

استمر :)

تايه يقول...

ربنا يوفقك يا مورو وشكرا على تعليقاتك المشجعة
بس هو فيه مادة اسمها مادة الكلبين؟
هو انت بتدرسى جزارة قسم كفتة من اياهم والا ايه

أنثى إستثنائيه يقول...

كلاكيت تانى مره متابعه ههههه

MOROOOO يقول...
أزال المؤلف هذا التعليق.
تايه يقول...

شرف لي يا استاذة انثى استثنائية
والله نورتونا النهاردة يا جماعة

MOROOOO يقول...

ههههههههههههههه

جزارة

لا

كنت بمتحن فى ماده اسمها e-business :D

تايه يقول...

كومبيوتر ساينس؟

MOROOOO يقول...

انا حاسبات و معلومات

بس قسم Information system

تايه يقول...

رائع انا كومبيوتر ساينس بس قديم من يجيى ممم 11 سنة

MOROOOO يقول...

ياااااااااااه 11 سنة

ده انا اقولكـ يا جدو على كده :D

تايه يقول...

:) ولا يهمك ما انت من دور احفادى برضة

;كارولين فاروق يقول...

اسلوبك جميل جدا ويضحك
بس اعمل حسابك ان مش كل الناس
عندها خبره بالمصطلحات الخاصه بالنت والكمبيوتر
بس لغه الشباب الحديثه لذيذه او لذوذه والله
مزيدا من هذا اللون الذوذ
والبوست خطير اخر حاجه

تايه يقول...

اشكرك يا كارولين ويارب دايما تزورينا ومنتحرمش من تعليقاتك اللطيفة

carmen يقول...

بوست عسوووول اوي
تسلم ايدك ^_^

bentelghrob يقول...

ممتع اسلوبك كعادتك..
بس فيه ملحوظه المصظلحات الى بتكتبها مش بفهمها كلها
فياريت التوضيح..
ومتشكره اوى على مرورك فى مدونتى المتواضعه
تحياتى

تايه يقول...

ميرسى يا كارمن وميرسى ليكى يا بنت الغروب
ان شاء الله هاعمل بوست عن المصطلحات اوضح فيه المصطلحات المجهولة :) ويا رب دايما بوستاتنا تعجبكوا

هبة فاروق يقول...

بوست جميل ودمة خفيف
مشكور تاية

تايه يقول...

اشكرك يا هبه متحرمش من تعليقاتك :)

bent masrya يقول...
أزال المؤلف هذا التعليق.

إرسال تعليق