الاثنين، 24 يناير، 2011 | By: تايه على النت

الـــسحـــاب الأبــــيــــض الجزء الأول

عنوان رومانتيكى مش كدة .....

زى حسن ونعيمة يا سلام على اسم نعيمة

اسم لذوذ وطيوب وحبوب وكل ما اخرة (وذ) او (وب)

واسمها ده جه ازاى يا سى تايه

ااقولك يا بت

بعد اما الوليه امها ولدتها

جه ابو نعيمة فى اديه مقصات زى ابو جلامبو

لانه بيشتغل مزين يطل ودخل علي مراته و قالها نعيما

فبصت له شذرا وزعقت فيه بصوت سرسوع

وقالت له نعيمه وكملت فى سرها " يا حمار"

المهم سيبكوا من شغل المزينيين ده

وتولع نعيمة على ابوها وامها فى يوم واحد

فى يوم من ايام طلعاتى النتيه J

و عبر برنامج الرغى الجديد ال MIRC

وفى غرفة الرغى بتاعة Egypt

اللى كنت بدخلها زهق لان الناس يا اما كانوا بيشتغلوا بعض

يا اما كانوا يتخانقوا مع بعض يا اما مأنتمين مع بعض

والعيال الادمن (مديرين غرف الرغى) اللى هما مسئولين

عن حفظ حالة السلم فى الغرفة ومنع البذاءات

و المهمة الرئيسية ذات الاهمية القصوى عندهم السهر على راحت الوزوزيلات

اللى فى الغالب بيبقوا فى حيازتهم ومنع التحرش النتى بهم

المهم ماكنوش عيال صيع مقطعين بطايقهم السخسية كان فيهم سذج

راجعوا قصة الاشتغالة اللى تمت مع واحد من الادمن بتوعهم فى البوستات الاولانيه

الطابع المصرى الفرعونى القديم عندهم كان غلاب زى اى حد اما بيبقى

مسئول عن حاجة يبدأ يمارس نشاطه الاستبدادى

فكانوا مع اول اختلاف يعملوا طرد أو (kick)

واحيانا يكملوا كرمهم بعمل حاجة تانيه الا وهى حظر (Kick and Ban)

لدخول الغرفة على السادة المشاغبين امثالى

وساعات الجنونة تشتغل يقوموا يطردوا الناس رخامة

المهم انا لما ابقى زهقان كنت اعمل حاجة من اتنين

يا اما ادخل على غرف العيال اليهود السيس

وافضل أأبح واغيظ فيهم لحد اما يطردونى ويعملوا kick and ban))

يا اما اتسنكح فى غرفة Egypt

اهو نعمل خير ونسخن العيال على الادمن

او اتكلم مع العيال اللى بيشتغلوا البشر وعاملين نفسهم بنات

الهدف ايه

ااقولكم منها لو صادفت ممكن تطلع مزمزية ويبقى فرجت

ولو غير كده اهو ادينا بنتسلى

لمحت بعينى الاسم ده فى الغرفة اسم السحاب الابيض

اسم نواعمى حريمى

بس ممكن يبقى اشتغاله

رحت فاتح معاه برايفت شات (Private Chat)

تفتكروا طلع ايه؟

لا المرة الجاية اشوفكوا على خير

6 التعليقات:

ray يقول...

gdi 'df fu] lh oghw ls;j h,g od,' hg;ghl

قصدي ليه بعد ما مسكت خيوط الكلام..تقول فاصل ونواصل

ليه..؟؟ مستنيه السحاب الابيض الجزئ الثاني..ويارب يكون ثاني وبس..^_^

اشوفك بعد الفاصل..^_^

;كارولين فاروق يقول...

مستنيين الباقيه
علشان انا حاسه بمفاجأه
منك في الاحداث
سلام

هبة فاروق يقول...

ههههههههههه
اكيد حيطلع ابو جلمبو اشتغالات يعنى
فى انتظار الباقية
تحياتى

تايه يقول...

rayوكارولين وهبة اشكركم لزيارة مدونتى

ray اتقلى على الرز واضح انك متحمسة تعرفى النهاية القصة دى احتمال تكون اكتر من جزئين :)

كارولين ازيك عاملة ايه؟ مش هاسبق الاحداث بس يا رب تعجبكم

هبة اشتغالات النت كتير بس محسوبك مفتح قوى :)

MOROOOO يقول...

انا بكره الاعلانات و الفواصل :(

بس شكلها فعلا هتطلع اشتغالة أو حد تعرفه :D

منتظرة الجزء التانى :)

تايه يقول...

الف مبروك يا جماعة مصر اتحررت من طاغوت وحاكم ظالم
ربنا يقدر لبلدنا الخير واعذرونى انى اتأخرت بصراحة ماكنش ليا نفس اكتب بعد اما شوفت اخواتى شهداء فى هذه الثورة المباركة ربنا يكتبهم عنده فى الشهداء
وربنا ييسر هاحاول اكتب الجزء التانى فى ااقرب وقت

إرسال تعليق