السبت، 12 فبراير، 2011 | By: تايه على النت

الـــسحـــاب الأبــــيــــض الجزء الثانى


الصراحة انا مش عارف اركز لانى فرحان وزعلان وعطشان بس الحمد لله مش جعان

لانى لسه متغدى من شوية ادينى وفرت عليكم غداء وساندوتشات يا عالم يا بخلاء

بس مش ممكن اتنازل او اتنحى عن طلب الحاجة الساقعة :)

و انا مدرك ان الاسابيع اللى فاتت كانت عصيبة ولكن وحدت الشعب المصرى الصراحة

وحدته فى التفليس و فى الانتصار على الطاغية اللى كان حاكمنا

انا فرحان لانى تاريخى اصبح جواه حدثين عالميين وصول مصر كاس العالم سنة 90

وبرغم الماتش التاريخى مع هولندا الا ان الجوهرى نكد على اللى جابونا

فى الماتشين اللى بعده وابقوا خلوا العيال تعمل بي بي على قبرى لو شمينا كاس عالم تانى

ثم بفضل الله وكرمه نجاح ثورة الشعب والترتيب هنا ترتيب تاريخى وليس ترتيب اهمية

وزعلان على شهداء الثورة الشباب اللى زى الورد وبدعو ربنا انه يتغمدهم برحمته

كمان زعلان ان خطاب الرئيس المخلوع قبل ما يمشى جاب للشباب المصرى عقم

وفيه ستات حوامل سقطت غير الاغماءات والسكتات القلبية والدماغية والجلطات

اللى نزلت على الشعب زى الوبا بتاع اختنا هنادى

وبقول للى اتجوزت او لسه متجوزتش تترحم على شبابها وشيخوخيتها

لاننا بقينا شباب فله وربنا يعوض عليكم و علينا

بس كان رد الشباب على الخطاب رائع واتعامل مع الحدث بشكل مصرى حضارى شعبى

انه رفع له بوز الجزم وده فعلا اللى كان يستحقه

المهم نرجع لمرجوعنا

لما ابتديت ارغى مع السحاب الابيض طقت فى دماغى فكرة شلوذعية

حاجة كدة باسميها تنكر وانتوا بتسموها كذب اخص بقى دى اخرتها

تنكر هو انت اشتغلت بلياتشوا يا سى تايه بيه

اخرس فلاح سيس ادب يوك

غيرت شخصيتى و اللغة الانجليزية كانت كويسة ساعتها قبل الله يرحمها

ما تروح فى الزهايمر المهم بعد هاى وماى وانت مين يا شابة او يا ياض

طلعت بنت من محافظة بعشقها و من منطقة مستوى كمان

والدها صاحب مصنع وكان واضح من طريقة الكلام والرغى انها بنت بغض النظر

اذا كانت متنكرة فى شخصية تانية زيى والا لا

وكانت بتدرس فى كلية نظرية هناك و من طريقة حوارها اكتشفت انها طيبة جدا

طب وانت يا تايه يا بيبى يا روح قلبى شخصيتك كانت ايه

عشان خاطر عيونكى الدوبالى مش هاعمل فاصل وهاقولك

اخترت اسم كنت اصلا عامل بيه ايميل الا وهو بيتر نورمان

وحكيت لها قصة عن عائلتى ان الوالد اميركى من اصل ايرلندى وان الام امريكية يهودية

انعم واكرم والاتنين بيشتغلوا فى السفارة الامريكية فى القاهرة

وانى بدرس كومبيوتر فى الجامعة الامريكية

يخرب بيت شيطانى ايه اللى اخترعته ده مش عارف

المهم ان اللغة الانجليزية ولله الحمد كانت ضعيفة شوية عندها

ف طريقة كتابتى اقنعتها بانى اميركى وكنت بتصرف كأنى اميركى

يعنى مكنتش برخم واغتت فى شيئ اللى تحب تجاوب عليه اهلا وسهلا

واللى متحبش يبقى forget it

يعنى على سبيل المثال طلبت اشوف صورتها فاعتذرت باسلوب لطيف

كنت ساعات ابتكر حواديت عشان اعرف شخصيتها من ردها ورأيها

و اكتشفت انها انسانة رائعة وفوق الوصف

منها حدوتة اخترعتها وكان رد فعلها عليها شديد الغرابة

حدوته ايه ؟؟؟؟؟

اشوفكوا المرة الجاية

4 التعليقات:

MOROOOO يقول...

ياه عليكـ يا مستر تايه لازم كده تعمل اعلانات

بس مش خسارة فيكـ الحاجة الساقعة ;)

متميز كالعادة :)

ray يقول...

انت.##*&.يابن.**&$#.طب..!!

لييييه؟ انت بتعمل كده ليه..

يوم ما توصل للموضوع..تخلص..

علي العموم..عجبني..طريقه الواد الامركاني..
كتير بيعملوها..نصيحه..بتبقي واضحه زي الشمس..في عز الليل..(ايه..!!) ما علينا
في انتظار البقيه..ويارب..مش تطول..وتطول في سرد القصه..ويارب..مش يكون حلم..وحد يقومك منه قبل النهايه
..
تحياتي..

تايه يقول...

مورو نبطل بقى عزومة المراكبية اكيد عارفها او قرتيها فى البوستات عموما دايما منورانا

راى انت مستعجلة على ايه هو يمكن البوست طول منى شوية عشان المقدمة بس تقدرى تقولى انها مقدمة لابد منها
بعدين انا بحاول اخلى فى نوع من انواع التشويق وياما فى الجراب يا حاوى :)
بعدين موضوع الواد الامريكانى ده كان فى 98 اما كانوا البنات زى ايه؟؟؟ ارجعى لبوستاتى الاولانيه
انما دلوقتى مش محتاجة قصص واختراعات الشباب بقوا يتخنقوا من البنات

هبة فاروق يقول...

انا داخلة اقولك مبروووووك على نجاح الثورة
وكل سنة وانت طيب وحلوة قصتك وفى انتظار الباقى
تحياتى

إرسال تعليق