الخميس، 5 يوليو، 2012 | By: تايه على النت

رخــامــة


اصدقائى البخلاء

واحنا اصحاب كدة افتراضين مش المفروض انكم تسألوا عليا بقالى فترة غايب

حتى فى عالم الاوهام مفيش حد بيسأل !!

يبقى ليه نشتكى الواقع واحنا فى الخيال منسيين

المهم مطولش عليكم لانى شايف فى عنيكم النوم

واللهم طولك يا روح

الدنيا بتأخد الواحد وانا نسيت نفسى مع السياسة والخناقات والانتخابات

ومن غير ما اسأل اسئلة بايخة انتخبت مين وكدة

لو انت من الاخر تبع شفيق يبقى ربنا يشفيك

ولو انتخبت مرسى يبقى ربنا يقوينا ويقويه

وانا قاعد النهاردة لا بيا ولا عليا والنت فاصل بقالوه يومين

لانى كالمعتاد طنشت ادفع الفاتورة لحد اما فترة السماح راحت

طقت فى دماغى ابص على فولدرات مهملة بقالها سنيين

يجى كدة من 10 او 15 سنة وقلت اكتب لكم بوست جديد

قبل ما اغطس تانى لان موود الكتابة رايح منى

افتكرت قد ايه كنت رخم خصوصا فى المناقشات والمجادلات فى الدين

بما انى كنت دودة كتب وبحب كتب مقارنة الاديان لانها بصراحة

كنز فى شرح العقائد وبتتكلم بالفلسفة والمنطق

وانا اصلى اعز التفكير والمنطقية والكلام الكبير ده

اتذكر لما عرفت ايميل صحفية فى جريدة انجليزية كتبت عن احداث الكشح

وكانت خيالية جدا دخلت قريت المقالة لقيتها بتتكلم عن قتل و صلب المسيحيين

وحرقهم احياء على ابواب البيوت وحاجات ماوراء الطبيعة

بس وقمت مشمر وكاتب لها اللى فيه النصيب بس بالادب

عبرت لها عن كم الجهل والجهالة اللى هى عايشة فيها

وانها متعرفش اصلا فين الكشح دى على الخريطة

وانها تبطل تتفرج على بوجى وطمطم النسخة الانجليزى عشان بوظت دماغها

ماكنتش اعرف بقى ان العالم دى مش بتكبر دماغها وتهمل رسائل القراء

زى ما بيحصل دلوقت

يعنى مثلا رئيس تحرير جريدة ثقيل على موقع الجريدة الالكترونى قبل التطوير

قفل فى صفحة مقالاته التعليقات عشان الناس كانت بتظبطه صح

و طبق المثل الخالد الباب اللى يجيى لك منه ريح سدوه واستريح

اما الوليه الصحفية الانجليزية اللى تنشك فى حواجبها

ردت فى المقالة اللى بعدها بالتلميح على ان فيه ناس اتهمتها بالجهل

وانها ماتعرفش خريطة مصر واكدت ان بوجى وطمطم الانجليزى

هو ترجمة صادقة لحياة جدها وجدتها وانه مش شغل خيال

(طبعا بوجى وطمطم دى زيادة من عندى يعنى احسن تصدقوا)

ماتابعتهاش بعد كدة لانها تقريبا انتحرت او اعتزلت الكتابة

وافتكرت ايام الرغى اما كنت بدخل على غرف الاديان الانجليزية

على الام اى ار سى ماكنش لسه ساعتها ظهر البالتوك

وادخل فى مناقشات فى العقيدة وما شابه

اللى كل اما افتكره ابتسم انى ناقشت واحدة فى ذات المرات

ولما ما عرفيتش ترد عليا قعدت تهرتل وتقولى انت الشيطان

وانت مش عارف ايه ومت يا عفريت مت يا شيطان

المهم انا بقى كل شويه اديها كلمة والوليه تتهبل اكتر

لقيت واحد فتح معايا برايفت شات يقولى انا زوج الوليه اللى انت بتكلمها

وانها متعصبه جدا وانه خايف عليها يجلها اللهم اكفنا الشر استحلز

وانها بتربى يتامى وكلام الصعبنيات ده وبصراحة طلب بأدب انى ما اردش عليها

قلت له والله انا ساكت بس هى اللى مش ساكتة

وان النقاش كان عادى ومش عارف هى ليه اتعصبت

بعد كدة اكتشفت انى انسان رخم

صحيح اصدقائى كانوا بيقولوا عليا كدة بس انا ماكنتش مصدقهم

انتوا عارفين الشباب مع بعض بقى دايما كل واحد وله صفة

بشهادتهم يعنى انا ولله الحمد انسان وطبيعى

لان الرخامة من عاهات البشر وليس الحمير

بس ده ماكنش رأى اصدقائى بس

لكن دى كانت اول كلمة نطقت بيها زميلة لما بدأت شغلها معانا فى الادارة

كل ده عشان ايه

الكوتشى اتبل ميه من تحت

وكنت بخبط الكوتشى فى ارضية الكوريدور عشان انشفه من البلل فيعمل صوت صرير

زى ارضية ملاعب كرة السلة الصراحة الصوت كان عاجبنى

ولما لاقتها حطت اديها على ودنها وبصت ناحيتى وشكلها كان متضايق

الصراحة اتكسفت ووقفت وبطلت وبصتلها وابتسمت للحظات وهى ابتسمت

بس وقمت كملت خبط و صرير بقى

فيها حاجة دى ؟؟؟؟

اشوفكوا بخير

12 التعليقات:

هــمـــزة مكســورة يقول...

حمد الله ع السلامة
ربنا يزيدك من فضله وتبطل رخامة
علشان الستات دول اعصابهم تعبانه مش حمل نرفزة
واحدة تنتحر من رخامتك يبقي ذنبها في ر قبتك

تايه يقول...

مش مشكلة تيجى غيرها وتنتحر برضوه :)

عبد الرؤوف عبد السلام يقول...

حمد الله ع السلامة

نهر الحب يقول...

مممم
شكلي حاجي هنا كتير

....
انا زي ما تكون كدة عندك ماسورة كلام وانفجرت
لا بلاش تتاخر في الكتابة لو بيحصلك كدة

التصرف بتلقائية احيانا مش بيكون رخامة شيء كويس ان الواحد ينصرف باللي حاسة...يس بأدب
:))

تايه يقول...

الله يسلمك ا عبدالرؤوف سعيد بزيارتك جدا

اشكرك نهر الحب واتمنى ان تنال كتابتى اعجابك ومتكونش مضيعة لوقتك

ا لعاب يقول...

شكرا لك ومدونة رائعةوجميلة بارك الله فيك …

ياسمين يقول...

عجبني تسلسل الكلام ,وجميل ان حضرتك بتعرف تحاور الديانات الآخري ...انا بئا كنت بحاول اعمل كدا بس انسحبت لاني مش متمكنة اوووي ..بالتوفيق

تايه يقول...

اشكرك ياسمين على مرورك بمدونتى المتواضعة
حوار الاديان محتاج شوية عدة ومجموعة كتب متعمقة فى الموضوع دة ربنا يوفقك

وصف الاحساس يقول...

الرخامه دي ساعات بتكون نعمه ما حسش بقيمتها اﻻ اما تحتاجها ومتعرفش تعملها
جايز تكون فن برده لانها اصرار علي شيء برخامه ومن ثم اصبحت رخامه
استمر .. استمر
منك نستفيد
تحياتي

تايه يقول...

ههه اول شخص يشجعنى على الرخامة تحياتى وصف الاحساس

لبنى أحمد نور يقول...

تايه على النت
للتأكد.. حضرتك هترشح تدوينتك دي للكتاب؟
رجاء التوضيح

تايه يقول...

هى التدوينة مقرفة للدرجة دى ؟؟؟
انا مرشحة للاشتراك لكن مش مرشحها للفوز حلو كدة

إرسال تعليق