السبت، 1 يناير 2011 | By: همزة

أول الحــكـــايـــات

بلغنى ايها التايه الحزين

ذو النت البطيئ أنه فى اواخر التسعينات

بدأ تايه الدخول هناك فى عالم النت

عالم الاساطير والناس اللى من مكانها تقدر تطير

وكمان بضغطه او ضغطتين يعملوا اوردرات فطير

وها هو تايه يقول انا جيت
☀☀☀☀☀☀☀☀☀☀

فى دنيا الفضاء التخيلية اللذيذة دى.اخنقكوا معايا وارجع بيكوا للتسعينيات

ايام النت لما كان بيشتغل بالفحم

مممم الماضى الرائع العريق الممزوج بطعم شاى الشيخ الشريب

وباكو سامبا بالشيكولاته البيضا

ايام اما كانت الكونيكشن اقصاها 10 ك ب.

والدخول كان بيتم عن طريق ارقام خاصة بمجلس الوزراء

ولو محظوظ يقع تحت ايدك اكاونت من بتوع الجامعة الاميريكية

يبقى ولى من اولياء الله الصالحين دعالك

اعرف واحد عمل دونلوود لويندوز 98 النسخة التجربية

قعد فيها اسبوع سايب خط التليفون مفتوح ليل نهار

كنت بجيب الجرايد كل يوم علشان اقرا " اب يقتل ولده بسبب التليفون"

لكن اتضح ان ابوه بيشتغل فى الخليج .تقريبا علشان يسدد فواتير التليفون للافندى

طبعا كان لازم يبقى لك اكاونت علشان تقدر تخش مش زى الهرجلة بتاعت دلوقت

الدخول كدة من غير لا احم ولا دستور كان فيه بروتوكول لدخول الحمام قصدى النت

ايامها المصريين كانوا كلهم اسكندرانيه (جدعان يعنى) مش عارف ايه جدع دى

(فى اللغة جدع انف فلان يعنى طيرها له) انت واد جدع افهموها بقى .

وانا عرفت ليه الاسكندرانيه بيتخنقوا من القاهريين بيفكروهم دايما انهم جدعان :)

المهم الاكاونت اللى يتعرف ينتشر على طول .

اعتقد مصر ايامها كانت شغالة بحوالى عشرين تلاتين اكاونت

كان فيه روح تعاون وايثار وكنا ماشيين بمبدأ

"الاكونت اللى ما توزعوش غيرك هايوزعوا فاعملها بجميله احسن"

انا لى صديق الله يمسيه بالخير هو اللى دلينى على موضوع النت

وهو اللى كان بيمدنى بالاكونتات علشان ااقدر ادخل

واصل الحكاية انى كنت بدرس فى المودرن اكاديمى

وكنت فى قسم الكومبيوتر ساينس

وكان لازم ولا بد اشترى كومبيوتر .

المهم كان ايامها كارت الشاشة ابو اتنين ميجا اوعى وشك

اخر تكنولوجيا انتجتها القريحة البشرية

وكان نازل معاه فيلم القناع بتاع الواد جيم كارى

وانا بقى كنت عايز اجيب الكارت ده عشان الفيلم

كومبيوتر وتشوف عليه فيلم - يا وحوى يااما اعدلونى على القبلة-

المهم زميلى ده قالى بلاش كارت الشاشة وهات كارت فاكس

علشان تدخل الانترنت .

المهم مين الانترنت دى يا خويا قعد يوضح لحد اما اقنعنى

كانت ايامها برامج التصفح الانترنت اكسبلورير والنيت سكيب

كانت ايامها محركات البحث ايه اوعى كان عندك altavista,lycos,infoseek

اللى جه بعدهم الياهوو واكتسحهم حاليا الجووجل

اما المزاج العالى بقى واللى خلانى احب النت برامج الشات وما ادراك

البداية مع برنامج اسمة الكوميك شات بيدخل على سيرفرات خاصة بيه

كانت عاملها ميكروسوفت مخصوص ومتوصى عليه

كان المصريين مايزيدوش عن عشرة منهم انا وصديقى

بعدها ظهر MIRC ثم ICQ واخيرا الماسنجر بتاع ميكروسوفت ثم الياهوو

وكان المصرى على الكوميك شات فاكهة الغرف هناك .كان يكفى ان الواحد يقول

hi , iam 21 m Egypt

والبرايفت شات يتفتح واتفرج على الكوميديا بقى لما واحدة تسألك وتقولك

" "do you have a camel?

ارد اقولها " طبعا واحدث موديل يا اختشى اربعة سلندر بفتيس غرز"

ولما الدنيا اتطورت شوية ودخل المصريين بقوة لاقتحام عالم الرغى

العيال العفاريت ما تعرفش عملوا ايه

بقى لما الناس تسمع كلمة مصرى يعملوا له kick

يضربوه شلوت بره اوضة الرغى يعنى

وكانت دى بداية الانهيار الحضارى والمكان العظيمة

اللى تبؤتها مصر بين امم الرغى على النت

بس احنا كشباب من البيونييرز مسكتناش واخدتنا الحمية الوطنية

وكمصريين اصلاء بقينا لما ندخل الغرف نقول بكل فخر...

"hi I am 22 m and I am not Egyptian"

و إن شاء الله لنا عودة

9 التعليقات:

MOROOOO يقول...

حلوه اوى أول الحكايات

و ان شاء الله كل الحكايات حلوة برده

تسلم دماغكم :)

همزة يقول...

اشكرك يا مورو ويارب دايما نشوفك على خير وفى كل مرة نرسم ابتسامة

Carmen يقول...

اسلوب لذيذ اوي ^_^
تسلم ايدك
تحياتي العطرة

همزة يقول...

اشكرك يا كارمن واتمنى ان البوستات القادم تنول اعجابك كمان

(green eyes) يقول...

يااااااااااه فكرتني باول ايامي مع النت
:)
لذيذ اسلوب كتابتك
تقبل مروري

bentelghrob يقول...

هههههههههههههه حلو اوى ومواكب للى احنا فيه .. كلامك بيمس كل واحد فينا.. بقينا مدمنين.. فى زمن مش لاقيين طريق نمشى فيه ولا حاسين بالامان كل الى هنعمله اننا ناخد كبسوله مسكن تخدر لنا الواقع ونتوه فى حركات وحبشتكنات بتشدنا صحيح لكن سرعان ما ينتهى مفعولها.. وتفضل تدور وتدور فى نفس الدايره تاااااايه ع النت ..اسلوب سلس وجديد.. اول مره ادخل مدونتك واستمتعت جدا ويارب يديم التواصل :))

همزة يقول...

اشكرك يا جرين ايز ويا ريت دايما البوستات بتاعتنا تعجبك وتشرفنا بمرورك علينا

واشكر بنت الغروب ويا رب دايما نتواصل

Unknown يقول...

مبدع وخالقى
اسلوب ولا اروع
متابعه بصمت حتى لا اخدش ذلك الجمال

غير معرف يقول...

اسلوب جميل و رااااااائع
جذاب من غير عذاب
ياتري هذا الذي يقال عليه سهل ممتنع ؟:)


amouna

إرسال تعليق